जम्मु–कस्मिरमा आतंककारी आक्रमण, २६ पर्यटक मारिए

भारतको जम्मु–कस्मिरस्थित पाहलगाममा मंगलबार भएको आतंकवादी हमलामा २६  पर्यटकले ज्यान गुमाएका छन् ।  यो आतंकवादी हमला भारतमा विगत केही वर्षयताकै सबैभन्दा ठुलो नागरिकमाथिको आक्रमण भएको अधिकारीहरूले बताएका छन् ।

प्रहरी स्रोतका अनुसार अहिलेसम्म २४ जनाको मृत्यु पुष्टि भइसकेको छ, तर यो संख्या अझै बढ्न सक्ने बताइएको छ ।
हालसम्म कुनै समूहले आक्रमणको जिम्मा लिएको छैन । तर, कस्मिर क्षेत्रमा सन् १९८९ देखि चलिरहेको विद्रोहमा लडाकुहरू भारतबाट स्वतन्त्रता वा पाकिस्तानसँगको मिलनको पक्षमा छन् ।  

पाहलगाम श्रीनगरबाट करिब ९० किलोमिटर टाढा पर्छ, जुन पर्यटकहरूबिच लोकप्रिय गन्तव्यस्थल हो । मृत्यु हुनेमा केही विदेशी पर्यटक तथा नौसेनाका अधिकृतसमेत रहेको भारतीय सञ्चारमाध्यमले जनाएका छन्। 

प्रधानमन्त्री नरेन्द्र मोदीले यस ‘क्रूर घटनाको’ निन्दा गर्दै दोषीहरूलाई कडा कारबाही गर्ने प्रतिबद्धता  जनाएका छन्। 

एक स्थानीय टुरगाइड वाहिदले एएफपीलाई भनेका छन्, ‘गोली चलिरहेको आवाज सुनेपछि म घटनास्थलतिर दौडिएँ र घाइतेहरूमध्ये केहीलाई घोडामा बोकेर अस्पताल पुर्‍याएँ। मैले त्यहाँ केही मानिसहरू भुइँमा लडिरहेका देखेँ ।’

मुख्यमन्त्री उमर अब्दुल्लाहले यो आक्रमण विगत वर्षहरूमा नागरिकमाथि भएको सबैभन्दा ठुलो घटना भएको बताए। 
गृहमन्त्री अमित शाह घटनास्थलतर्फ गएका छन् । उनले दोषीलाई कडा सजाय दिने चेतावनी दिएका छन्। 

अनन्तनागस्थित अस्पतालमा केही घाइतेहरू पुर्‍याइएको छ, जसमा दुईजनालाई गोली लागेको र एकजनाको घाँटीमा गोली लागेको उल्लेख गरिएको छ ।
विपक्षी नेता राहुल गान्धीले यो घटनालाई ‘हृदयविदारक’ भन्दै संघीय सरकारले उत्तरदायित्व लिनुपर्ने माग गरेका छन् ।

सरकारले पछिल्ला वर्षहरूमा कस्मिरलाई पर्यटन केन्द्रको रूपमा प्रवर्द्धन गर्दै आएको छ । सन् २०२४ मा झन्डै ३५ लाख पर्यटकहरूले कस्मिर भ्रमण गरेका थिए ।
भारतले पाकिस्तानमाथि यस्ता आक्रमणमा सहयोग पुर्‍याएको आरोप लगाउने गरेको छ भने पाकिस्तानले कस्मिरको आत्मनिर्णयको अधिकारको समर्थन मात्र गर्ने बताउँदै आएको छ ।
यसभन्दा पहिले सन् २०१९ मा पुलवामामा भएको आक्रमणमा ४० सुरक्षाकर्मीको मृत्यु भएको थियो। सन् २००० मा भएको आक्रमणमा ३६ भारतीय नागरिकको ज्यान गएको थियो ।