प्रभु बैंक र पोखराको कृषि बजारबिच व्यावसायिक सम्झौता

प्रभु बैंक लिमिटेड र पोखरा महानगरपालिका– ९ शान्ति वनवाटिकास्थित कृषि बजार व्यवस्थापन समितिबिच व्यावसायिक सम्झौता भएको छ । सम्झौतापत्रमा समितिका अध्यक्ष नवराज दुवाडी तथा बैंकका गण्डकी प्रदेश प्रमुख, प्रदेश अधिकृत राजु रानाले हस्ताक्षर गरेका हुन् । सम्झौताअनुसार आयातीत कृषिउपज बिक्री–वितरणको कारोबारलाई बैंकिङ पहुँचसहित डिजिटल माध्यममा रूपान्तरण गरिनेछ ।  

यसखालको सम्झौताले समितिमातहतका सम्पूर्ण फलफूल तथा तरकारी बजारको दैनिक कारोबारमा सहजता प्राप्त हुने विश्वास गरिएको छ । प्रमुख प्रदेश अधिकृत र रानाले डिजिटल सेवामार्फत कृषि बजारको आर्थिक कारोबारमा सहजीकरण हुने विश्वास प्रकट गरे । 

समितिअन्तर्गत सञ्चालित व्यवसायीलाई दैनिक कारोबार नगदरहित बनाउने उद्देश्यका साथ क्युआर कोड, डिजिटल भुक्तानी तथा कारोबारका लागि आवश्यक इन्टरनेट सेवा बैंकले उपलब्ध गराउनेछ । साथै, व्यवसाय विस्तारका लागि व्यवसायीको आवश्यकता र बैंकको नियमानुसार कर्जा सुविधा पनि उपलब्ध गराउने सम्झौतापत्रमा उल्लेख छ ।