- वि.सं Invalid date format
सर्लाहीको बागमती नगरपालिकाका मेयर भरतकुमार थापाविरुद्धका दुई भ्रष्टाचार मुद्दामा सुनुवाइ सुरु भएको छ । विशेष अदालतले मंगलबारदेखि मूल मुद्दामा सुनुवाइ सुरु गरेको हो ।
विशेष अदालतका अध्यक्ष टेकनारायण कुँवर तथा सदस्यहरू तेजनारायणसिंह राई र विदुर कोइरालाको इजलासले दुवै मुद्दालाई साथसाथै राखेर हेरिरहेको छ । विभिन्न मुद्दा एक सातादेखि सामान्यतया ६ महिनाभित्रै धमाधम फस्र्योट गरिरहेको विशेषमा एक वर्षअघि दायर यी मुद्दा विविध कारणले ढिलाइ हुँदै आएको थियो ।
स्रोतका अनुसार विशेषका सदस्य रामबहादुर थापाका छोराले यस मुद्दामा वकालतनामा हालेका कारण न्यायाधीश थापा सम्मिलित इजलासले यो मुद्दा दुईपटक हेर्न नमिल्नेमा परेको थियो ।
अख्तियार दुरुपयोग अनुसन्धान आयोगले २८ चैत ०८० मा मेयर थापाले स्रोत नखुलेको सम्पत्ति आर्जन गरेको दाबीसहित चारजनामाथि मुद्दा दर्ता गरेको थियो । ०७४ असोजदेखि ०७९ माघसम्म सार्वजनिक पदधारण गर्दाको अवधिमा थापाले अवैध रूपमा पाँच करोड रुपैयाँभन्दा बढी गैरकानुनी सम्पत्ति आर्जन गरेको अभियोग लगाइएको छ ।
उनको आय १३ करोड २० लाख रुपैयाँभन्दा बढी रहेको देखिएको थियो । जबकि उनको वैध आय साढे सात करोड रुपैयाँभन्दा बढी रहे पनि पाँच करोड ३३ लाख रुपैयाँभन्दा धेरै देखिएपछि उक्त रकम बिगो कायम गर्दै मुद्दा चलाइएको थियो ।
