जीवनरक्षाका लागि दुबईबाट युवराज थापाको याचना

त्रिवेणी गाउँपालिका–६, सल्यानका ३५ वर्षीय युवराज थापा ०७९ सालमा वैदेशिक रोजगारीका लागि दुबई गएका थिए। उनी दुबईको होटेल ह्यातको स्विमिङ पुलमा लाइफ गार्डका रूपमा कार्यरत थिए। 

एक दिन होटेलमा आएका कंगोका नागरिक स्विमिङ गर्न पुलमा गए। सोही वेला उनलाई हृदयघात भयो। यो समय ड्युटीमा थिए युवराज। हृदयघात भएका कंगोका नागरिकलाई उपचारका लागि अस्पताल लगिए पनि केही समयमै अस्पतालले मृत घोषणा गर्‍यो। यो घटनापछि युवराजको जिन्दगीले अधोगति लियो। 

घटनापछि मृतकका आफन्तले होटेल ह्यातको स्विमिङ पुलमा लाइफ गार्डको रूपमा कार्यरत युवराजविरूद्ध दुबई अदालतमा मुद्दा दिए। अदालतले युवराजलाई दोषी ठहर गर्दै दुई लाख दिराम अर्थात् नेपाली ७६ लाख ब्लड मनी बुझाउनुपर्ने फैसला गर्‍यो।

अदालतको फैसला आउनेबित्तिकै उनले ब्लड मनीबापतको रुपैयाँ जम्मा गर्न हारगुहार गरे पनि कुनै सीप चलेन। यही कारण उनले जीवनरक्षाको लागि सार्वजनिक रूपमा अपिल गरेका छन्।

उनको घरका आर्थिक अवस्था एकदमै कमजोर छ । सल्यानमा भिरालो बारी र घरबाहेक अरू केही छैन। छोरालाई स्वदेश ल्याउन ७६ लाख जम्मा गर्न सक्ने अवस्था नभएको युवराजका बुबा मानबहादुर थापाले बताए। ‘साँझ–बिहानको छाक टार्न मुस्किल छ। छोराले कमाएर पठाउला भन्ने लागेको थियो। तर, त्यो आशा पनि अब रहेन,’ उनले भने, ‘सबैको साथ र सहयोग पाए छोरालाई स्वदेश ल्याउन सकिन्छ कि भन्ने आशा छ।’

युवराजलाई स्वदेश फर्काउन आवश्यक पर्ने ब्लड मनी जुटाउन त्रिवेणी गाउँपालिका अध्यक्ष खिमबहादुर रावतले पनि चासो लिएका छन्। उनले १९ चैतमा सार्वजनिक अपिल गर्दै युवराजलाई स्वदेश फिर्ता गर्ने अभियानमा सहयोग गर्न अपिल गरेका छन्। 

परिबन्धमा परी ठुलो धनराशी तिर्नुपर्ने भएपछि युवराजको जीवनरक्षाका लागि विभिन्न व्यक्तिले स्वैच्छिक सहयोग गर्न थालेको बुबा मानबहादुरले बताए। 
युवराजकी पत्नी अञ्जना केसी थापाले हालसम्म करिब ११ लाख संकलन भएको बताइन्। उनले ब्लड मनी बुझाउने समय अब एक महिना मात्र बाँकी रहेको जानकारी दिइन्। ‘अदालतले करिब ६ महिनाअघि नै फैसला गरेको हो,’ उनले भनिन्।  

युवराजका अढाई र नौ वर्षका दुई छोरा छन्। उनले पति जेलमा परेपछि छोराहरूको पढाइमा समेत असर परेको गुनासो गरिन्। ‘सासुससुरा काम गर्न नसक्ने हुनुहुन्छ। घरबाट हजार रुपैयाँसमेत निकाल्न नसक्ने अवस्था छ,’ उनले भनिन्, ‘उहाँ (पति) अहिले अप्ठ्यारोमा हुनुहुन्छ। ब्लड मनी जम्मा गर्न नसक्ने हो भने उहाँको ज्यान खतरामा छ। उहाँको जीवनरक्षाका लागि देश र समाजलाई गुहार्नुपरेको छ। सबैले साथ र सहयोग गर्नुहुनेछ भन्ने आशा छ।’

युवराजले सामाजिक सञ्जालमार्फत सबैसँग सहयोगका लागि याचना गरेका छन्। ‘मेरो स्वभाव सहयोग माग्नेभन्दा सहयोग गर्ने छ, तर आर्थिक स्थितिले सक्दै नसकेपछि सहयोग माग्न बाध्य भएको छु,’ युवराज लेख्छन्, ‘म अहिले अत्यन्त जटिल अवस्थामा छु। मेरो यो अहिलेको आर्थिक अभाव र मानसिक तनाव कम गर्न सम्पूर्ण नेपाली दाजुभाइ, दिदीबहिनीले आर्थिक सहयोग गरेर उद्धार गर्नुहुनेछ भन्ने पूर्ण विश्वास लिएको छु।’