‘जनयुद्ध’ शब्दको प्रतिबन्ध लोकतन्त्रको उपहास : उपमहासचिव शर्मा

नेकपा (माओवादी केन्द्र)का उपमहासचिव जनार्दन शर्माले सरकारी कामकाजमा ‘जनयुद्ध’ शब्दको प्रयोगमाथिको प्रतिबन्ध लोकतन्त्रको उपहास भएको टिप्पणी गरेका छन्।

बिहीबार सर्वोच्च अदालतले सरकारी कामकाजमा ‘जनयुद्ध’ शब्द प्रयोग नगर्न अन्तरिम आदेश दिएको थियो। त्यसमा असन्तुष्टि पोख्दै शर्माले शुक्रबार सामाजिक सञ्जालमार्फत यस्तो टिप्पणी गरेका हुन्।

सामाजिक न्यायको प्रवक्ता जनयुद्धलाई चिसो छिँडीमा सडाउन खोजिएको भन्दै उनले देश बनाउने बाँकी अभिभारा पूरा गर्न जनयुद्ध नयाँ स्वरूपमा वेब र एआईमार्फत प्रस्तुत हुने धारणा राखेका छन्। 

‘तिमी प्रतिबन्ध भएको सुनेँ, हुन सक्छ तिमीलाई सामाजिक न्यायको प्रवक्ता बुझेर चिसो छिँडीमा सडाउन चाहन्छन्। धारालाई तिम्रो प्रतिकूल बनाउनमा आफ्नै आत्मबलको कमी भएको महसुस गरेको छु। तर, युगको माग, युवाको दिमाग र प्रविधिको विकाससँगै जनआकांक्षा पूरा गर्न नयाँ स्वरूपमा नयाँ पहिचान बोकेर, पुरानो नाल होइन वेभ बनेर फेरि आउने छौ,’ शर्माले फेसबुकमा लेखेका छन्, ‘देशको आवश्यकता पूरा गर्ने लक्ष्य बोकेर बाँकी अभिभारा पूरा गर्ने संकल्पसहित नयाँ पुस्ताको चाहनाअनुसार एआईमा सवार हुनेछौ। प्रतिबन्ध त लोकतन्त्रको उपहास हो। जनयुद्ध तिमी प्रतिबन्धित भएछौ।’