लालझाडीमा जंगली हात्तीको आतंक

लालझाडी गाउँपालिका क्षेत्रमा जंगली हात्तीको बथानले उपद्रो मच्चाउन थालेको छ । साँझ नपर्दै हात्तीको बथान बस्तीमा छिरेर घर भत्काउने, घरभित्र राखेका अन्न, खेतमा लगाएको उखुबाली खाएर नोक्सानी पुर्‍याउन थालेकाले ज्यान जोगाउन समस्या भएको स्थानीयको गुनासो छ ।

गाउँपालिकाको वडा नं. ३ र ४ मा हात्तीको बथानले उखुबालीमा ठुलो क्षति पुर्‍याएको छ । एक महिनादेखि लालझाडी संरक्षण क्षेत्र र शुक्लाफाँटा राष्ट्रिय निकुञ्जबाट छुट्टाछुट्टै समूहमा आउने हात्तीले क्षति पुर्‍याउन थालेको गाउँपालिकाका अध्यक्ष निर्मल रानाले बताए । ‘हात्तीको आक्रमणमा परेर एकजनाले ज्यान गुमाइसकेका छन् । स्थानीय बासिन्दाका आधा दर्जनभन्दा बढी घर भत्काइदिएको छ, घरभित्र राखेको अन्न खाएर बिजोग बनाएको छ,’ उनले भने ।

केही दिनअघि हात्तीले आक्रमण गरेर स्थानीय रामदल रानाको ज्यान लिएपछि स्थानीय बासिन्दा भगाउनका लागि डराउने गरेका हुन् । एक महिनाको अवधिमा हात्तीको बथानले स्थानीय किसानको ८० बिघाभन्दा बढी क्षेत्रफलमा लगाएको उखुबाली खाएर पूर्ण रूपमा क्षति पुर्‍याएको अध्यक्ष रानाको भनाइ छ ।

उनका अनुसार सिगलपट्टीमा तीन घर, दुई गोठ, पर्सियामा दुई घर, डुंगामा एक घर भत्काएर पूर्ण क्षतिग्रस्त बनाइदिएको छ । किसानले बैंकबाट कर्जा लिएर गरेको उखुबाली हात्ती सखाप पारेको उल्लेख गर्दै अध्यक्ष रानाले स्थानीयलाई जिउज्यान जोगाउन मुस्किल हुन थालेको बताए।

गाउँपालिकाको वडा नं. ३ का किसान खडक चौधरीले एक बिघा जग्गामा लगाएको पूरै उखुबाली हात्तीले नोक्सानी गरेपछि सहकारीबाट खेती गर्दा लिएको कर्जा तिर्न समस्या भएको बताए ।

हात्तीले लालझाडी संरक्षण क्षेत्रमा भर्खरै छावा (बच्चा) जन्माएकाले त्यो क्षेत्र छाडेर नजाने गरेको वडा नं. ३ का अध्यक्ष टीकाराम चौधरीले बताए । उनका अनुसार दिउँसोपख बस्तीनजिकैको वनक्षेत्रमा रहने हात्ती साँझ नपर्दै उखुबारीमा पस्ने गरेका छन् । वडामा हालसम्म हात्तीको बथानले ३५ जना किसानको २० बिघा जग्गाको उखुबालीमा व्यापक नोक्सानी गरेको उनले बताए ।

वडा नं. ४ का अध्यक्ष बहादुर राना स्थानीय बासिन्दाको घर, उखुबाली, तोरीबाली जोगाउन स्थानीय बासिन्दासँगै रातभर जाग्राम बसेर हात्ती भगाउने कार्यमा संलग्न रहँदै आएको बताए । थप क्षति हुनबाट जोगाउन हात्ती नियन्त्रण गरी जिउधनको सुरक्षा गरिदिनका लागि उनले सुरक्षा निकायसँग अनुरोध गरेका छन्‌ ।