‘हाइपर फन्ड’का नाममा ५३ जनाबाट ६ करोड ठगी 

थपिँदै सिआइबीमा उजुरी, नाइकेहरू विदेशमा 

‘हाइपर फन्ड’का नाममा ठगिएका पीडितहरू प्रहरीमा पुग्ने क्रम बढेको छ । प्रहरीको केन्द्रीय अनुसन्धान ब्युरो (सिआइबी)मा हालसम्म ५३ जनाले उजुरी गरेका छन् । उनीहरूको ६ करोड २८ लाख रुपैयाँ ठगिएको छ । सिआइबीले ठगीमा संलग्न ललितपुर, इमाडोल बस्ने नानु घिमिरे (काजल)लाई पक्राउ गरी अनुसन्धान गरिरहेको छ । ठगी र संगठित अपराधको कसुरमा अनुसन्धान भइरहेको र यसमा ३० जनाभन्दा धेरै फरार रहेको सिआइबीले जनाएको छ । 

छोटो समयमै लगानीको तेब्बर आम्दानी हुने आश्वासन दिई पिरामिड शैलीको नेटवर्किङ समूह बनाएर ठगी भएको हो । यसमा ठगीका धेरै नाइकेहरू विदेशमा रहेको सिआइबी स्रोत बताउँछ । सिआइबीले ३० जनाभन्दा बढी विरुद्ध पक्राउ पुर्जी जारी गरिसकेको छ । ठगीमा पीडित र ठग्नेहरू धेरै विदेशमा रहेको सिआइबीका निर्देशक एआइजी श्यामलाल ज्ञवालीले बताए । उनका अनुसार मुख्य नाइके बेलायत, पोर्चुगललगायत देशमा छन् । नेपाली मूलका उनीहरूमध्ये कतिपयले विदेशको नागरिकता लिइसकेका छन् । 

गैरआवासीय नेपाली संघका महत्वपूर्ण जिम्मेवारीमा रहेका व्यक्तिसमेत यस्तो नेटवर्कमा आबद्ध रहेको स्रोत बताउँछ । बेलायतमा रहेका ललितकुमार न्यौपाने, कुमार गुरुङ, कृष्ण बगाले, पोर्चुगलका रोशन पोखरेल, चिन्तामणि छन्त्याललगायतविरुद्ध सिआइबीमा पीडितले उजुरी गरेका छन् । उजुरी आउने क्रम दैनिकजसो बढिरहेको सिआइबीले जनाएको छ । ठगी गर्ने गिरोह पनि फरक–फरक देखिएको छ । 

पक्राउ परेकी घिमिरे सो समूहको नेपालकी प्रमुख रहेको अनुसन्धानमा खुलेको छ । इजरायलबाट फर्किएकी उनले आफैँ सदस्य बनाउनेदेखि अरूको कारोबार आफ्नो बैंक खाताबाट गर्दै आएकी थिइन् । २० महिनाभित्र तेब्बर फिर्ता दिने आश्वासनसहित धेरैजसोलाई सुरुमा तीन सय अमेरिकी डलर लगानी गर्न लगाइन्थ्यो । सुरुमा थोरै प्रतिफल दिएर मोटो रकम लगानीका लागि प्रोत्साहित गर्नेमा पछि कम्पनी नै नक्कली भएको खुलेपछि पीडितहरू प्रहरीमा पुगेका हुन् । 

सुरुमा हाइपरभर्स नाममा खोलिएको सो कम्पनीको मुख्य कार्यालय अस्ट्रेलियामा रहेको र चिनियाँ मूलका अस्ट्रेलियन नागरिकलाई प्रमुख भनेर विश्वासमा पारेर पैसा उठाइएको थियो । यसका लागि उनीहरूले एक वेबसाइट बनाएका थिए । जहाँ गएर सदस्य बनेकाले आफ्नो ब्यालेन्स हेर्न पाउँथे । कम्पनी आधिकारिक नै भएको आश्वासनमा यसरी वेबसाइटमा ब्यालेन्स देखाएर ठगी भएको हो । हाल सो वेबसाइट बन्द छ । 

पिरामिड शैलीको नेटवर्किङ कारोबारमा थप सदस्य बनाएमा आफ्नो आम्दानी बढ्दै जाने गरी एकपछि अर्काेलाई यसरी ठगीको जालमा फसाइएर नेटवर्किङ शैलीमा फसाइएको पीडितको उजुरी छ । अमेरिका, अस्ट्रेलिया, बेल्जियम, इजरायललगायत देशमा रहेका नेपालीहरू यो फन्डमा आबद्ध भएका छन् । सिआइबीमा विदेशमा रहेका नेपालीले पनि उजुरी दिन थालेका छन् । 

यस्तो ठगीले देशको अर्थतन्त्रमा समेत असर पारिरहेको अनुसन्धानमा प्रहरी अधिकारीहरू बताउँछन् । डलरमा कारोबार हुने भएकाले नेपालमा रहेका व्यक्तिले विदेशमा रहेका आफ्ना आफन्तमार्फत पैसा हाल्न लगाउने गरेका छन् । पछि त्यसको कारोबार नेपालमै मिलाउने गरिएको छ । हजारौँ नेपाली यस्ता फन्डमा लगानी गरिरहेकाले यसबाट विदेशबाट आउने रेमिटेन्समा समेत असर पारेको छ । सिआइबीले दुई वर्षअघि यस्तै अपराधमा इन्फिनिटी ग्लोबल ट्रेडर्स नामक कम्पनीविरुद्ध मुद्दा चलाएको थियो । दुबईमा बस्ने राकेश पन्त नेतृत्वको समूहले विदेशमा रहेका नेपालीलाई नै ठगी गरेको थियो । करिब ३० हजार नेपालीलाई सो गिरोहले ठगी गरेको मुद्दा हाल अदालतमा विचाराधीन छ ।