मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० फाल्गुण २२ मंगलबार
  • Tuesday, 05 March, 2024
२०८० मङ्सिर १९ मंगलबार २२:३६:००
Read Time : < 1 मिनेट
विश्व डिजिटल संस्करण

गाजा ‘मानवताको सबैभन्दा अन्धकार समय’मा पुगेको छ : डब्लुएचओ

Read Time : < 1 मिनेट
२०८० मङ्सिर १९ मंगलबार २२:३६:००

विश्व स्वास्थ्य संगठन (डब्लुएचओ) ले गाजापट्टीमा स्थिति लगातार बिग्रिँदै गएको र मानवताको ‘सबैभन्दा अन्धकार समय’ नजिक पुगेको बताएको छ । 

हमासको लडाकु समूहले अक्टोबर ७ मा गरेको हमलापछि इजरायलले हमासविरुद्ध युद्धको घोषणा गरेको छ । हमासको हमलामा इजरायलमा अधिकांश सर्वसाधारणसहित एक हजार दुई सयको मृत्यु भएको थियो भने हमासले करिब दुई सय ४० बन्धकलाई गाजामा ल्याएको थियो । 

इजरायलले हमासलाई समाप्त पार्ने र सबै बन्धकको मुक्ति सुनिश्चित गर्ने वाचा गरेको छ । गाजामा हमासद्वारा सञ्चालित स्वास्थ्य मन्त्रालयले युद्धमा गाजामा करिब १५ हजार नौ सय मानिस मारिएको बताएको छ । 

कब्जा गरिएको प्यालेस्टिनी क्षेत्रमा डब्लुएचओका प्रतिनिधि रिचर्ड पिपरकोर्नले मंगलबार दक्षिणी गाजापट्टीको राफाबाट भिडियो लिंकको माध्यमबाट जेनेभामा पत्रकारहरूसँग मध्य र दक्षिणी गाजाबाट आउने मानिसको संख्या अत्यधिक बढेको बताए ।

इजरायली सेनाले मंगलबार दक्षिणी गाजामा हमास लडाकुसँग युद्ध सुरु गरेको छ । युद्धले सर्वसाधारण घेरामा परेको प्यालेस्टिनी क्षेत्रलाई निरन्तर खुम्च्याएको छ । प्रारम्भमा उत्तरी गाजामा ध्यान केन्द्रित गरेपछि इजराइली सेनाले अहिले दक्षिणमा स्थल सेनालाई पठाएको छ र सर्वसाधारणलाई त्यहाँबाट हट्न आग्रह गरेको छ । 

‘स्थिति प्रत्येक घन्टा बिग्रिँदै गइरहेको छ, यहाँ दक्षिणी इलाकासहित चारैतिर तीव्र बमबारी भइरहेको छ, धेरै मानिस हतास छन् र करिब सबै मानिस आघातको अवस्थामा छन्,’ पिपरकोर्नले भने, ‘हामी मानवताको सबैभन्दा अन्धकार घडीको नजिक छौँ, यो बमबारी र जीवनको मूर्खतापूर्ण क्षति रोकिनुपर्छ र हामीलाई दिगो युद्धविरामको आवश्यकता छ ।’  (रासस/एएफपी)