- वि.सं २o८o बैशाख ३ आइतबार
समुद्री सतहबाट दुई हजार एक सय मिटर उचाइमा रहेको लमजुङको स्मार्ट भिलेज घलेगाउँमा नयाँ वर्षको अवसरमा ‘स्मार्ट भिलेज आमन्त्रित छैटौँ गोल्डकप फुटबल प्रतियोगिता’ आयोजना गरिएको छ ।
घलेगाउँमा विगतका वर्षहरूमा खुला फुटबल प्रतियोगिता आयोजना गर्दै आएकोमा यसपटक पहिलोपटक आमन्त्रित फुटबल प्रतियोगिता आयोजना गरिएको पर्यटन व्यवस्थापन समिति, स्मार्ट भिलेज घलेगाउँका अध्यक्ष प्रेमबहादुर घलेले बताए ।
उनका अनुसार घलेगाउँस्थित नाइन ‘ए’ साइडको स्वर्गभूमि रंगशालामा हुने प्रतियोगिता सञ्चालन गरिएको छ । प्रतियोगितामा आमन्त्रित खेलाडीलाई खाना र वासको नि:शुल्क व्यवस्था गरिएको अध्यक्ष घलेले बताए । प्रतियोगितामा जिल्लाभित्रका चार र बाहिरी जिल्लाका ६ टिम सहभागी छन् ।
क्व्होलासोंथार गाउँपालिकाका अध्यक्ष सूर्यप्रसाद गुरुङले ग्रामीण भेगमा आयोजना गरिएको फुटबल प्रतियोगिताले पर्यटन प्रवर्द्धनमा थप सहयोग पुग्ने बताए । उनले भने, ‘प्रतियोगिताले पर्यटन प्रवर्द्धनमा घलेगाउँसँगै सिंगो गाउँपालिकाको प्रचारप्रसारमा टेवा पुग्नेछ ।’ प्रतियोगिताको पहिलो पुरस्कारको प्रायोजन पर्यटन समिति आफैँले गर्ने र दोस्रो पुरस्कारको प्रायोजन क्व्होलासोंथर गाउँपालिका– ३ ले गरेको वडाध्यक्ष आसवीर गुरुङले बताए ।
आमन्त्रित स्मार्ट भिलेज गोल्डकप फुटबल प्रतियोगितामा प्रथम हुनेलाई नगद पाँच लाख पाँच सय ५५ रुपैयाँ, गोल्डकप र मेडल प्रदान गरिनेछ । द्वितीय हुनेलाई नगद तीन लाख तीन सय ५५ रुपैयाँ, कप र मेडल तथा सर्वाधिक गोलकर्ता र उत्कृष्ट खेलाडीलाई नगद १०–१० हजार रुपैयाँ र मेडल प्रदान गरिनेछ । प्रतियोगिता वैशाख ८ गते सकिनेछ ।
