१० हजार दिएर नेपालीको बैंक खाता प्रयोग, नौ चिनियाँसहित १९ जना पक्राउ 

नेपालमा चिनियाँ नागरिकले कल सेन्टर चलाएर अनलाइनमार्फत विभिन्न देशका नागरिकलाई ठगी गरेका घटना नौलो होइन । तर, केही चिनियाँले नेपालीलाई नै संगठित रूपमा अनलाइनमार्फत ठगी गर्न थालेका छन् । यस्तो गिरोहमा संलग्न नौ चिनियाँसहित १९ जनालाई पक्राउ गरी प्रहरीले अनुसन्धान थालेको छ । 

अनलाइन व्यापारमा उच्च प्रतिफलको प्रलोभनमा ठगी गर्नेलाई काठमाडौं उपत्यका अपराध अनुसन्धान कार्यालयले मंगलबार पक्राउ गरेको हो । अनलाइनमार्फत सामान किनबेच गर्दा केही दिनमै उच्च नाफा हुन्छ भनी प्रलोभनमा पारेर पैसा हाल्न लगाउने र लगानी बढाउँदै लगेर सो रकम नै ठगी गर्दै आएको अपराध अनुसन्धान कार्यालयका प्रमुख एसएसपी डा. मनोज केसीले बताए । एक पीडितले ४८ लाख रुपैयाँ ठगिएको भनेर दिएको उजुरीका आधारमा प्रहरीले गिरोहलाई पक्राउ गरेको हो । ‘यसअघि पक्राउ परेका चिनियाँले अन्य देशका नागरिकलाई ठगी गरेको देखिएको थियो,’ एसएसपी केसीले भने, ‘यसपटक भने नेपालीमाथि नै ठगी गरेको पाइयो ।’ 

सुरुमा थोरै रकम लगानी गर्न लगाउने र त्यसमा केही दिनमै ३० प्रतिशत नाफाको रकम उनीहरूको खातामा पठाउँथे । तर, लगानी रकम भने उनीहरूले चलाएको गोप्य वेबसाइटमै ब्यालेन्सका रूपमा देखाइन्थ्यो । नाफा आएपछि थप पैसा लगानी गर्न लगाई उनीहरूले फसाउँदै लग्थे । जसअनुसार एकै व्यक्तिले ४८ लाख रुपैयाँसम्म गुमाएका छन् । आफ्नो लगानी फिर्ता गर्न खोज्दा नपाएपछि ती व्यक्ति प्रहरीमा पुगेका थिए । सोही आधारमा अनुसन्धान गर्दा एउटै खाताबाट एक करोड ६४ लाख रुपैयाँसम्म निकालिएकाले यसमा पीडितहरू धेरै भएको हुन सक्ने एसएसपी केसीले बताए ।

अनलाइन बजारमा जस्तै विभिन्न सामानको खरिद गरी तत्कालै बिक्री गरेको देखाएर ठगी हुन्थ्यो । खासमा कुनै पनि सामानको त्यसरी खरिद–बिक्री नै हुने गरेको थिएन । बिक्री भएको देखाएर उनीहरूले भ्रममा पार्दै आएका थिए । 

प्रहरीका अनुसार आर्थिक कारोबारका लागि उनीहरूले नेपाली नागरिकको नाममा बैंक खाता खोलेर त्यसमार्फत लेनदेन गर्दै आएका थिए । चिनियाँलाई सघाउने मुख्य व्यक्ति दोलखाका अर्जुन श्रेष्ठसहित १० नेपाली पनि पक्राउ परेका छन् । पक्राउ पर्ने अन्यमा दोलखाकै बुद्धिराज श्रेष्ठ, नुवाकोटका इन्द्र तामाङ, राजकुमार लामा, बुढानीलकण्ठका प्रयास भण्डारी, रामेछापकी रविना सुनुवार, लमजुङकी सुनिता गुरुङ, मकवानपुरकी जमुना गुरुङ, उदयपुरकी अनिता मगर र गोरखाकी अनु गुरुङ छन् । 

सो गिरोहबाट धेरैजना पीडित भएको हुन सक्ने, तर डराएर उजुरी नआएको हुन सक्ने प्रहरी आशंका छ । त्यसरी अनलाइन कारोबार गर्नेलाई उनीमध्येबाटै प्रहरी बनेर कतिपयले म्यासेज पठाउने गर्दथे । प्रहरीमा उजुरी गरे आफूहरू नै फस्ने भ्रममा पारेर चिनियाँ गिरोहले त्यसरी ठगी गरेको हो । धेरैलाई ह्वाटसएपमार्फत सम्पर्क गरी सो जालमा फसाउने गरेको प्रहरी अनुसन्धानले देखाएको छ । सुरुमा सम्पर्क गरेपछि टेलिग्राममा अप्रेसन टिचर नामक च्यानलमार्फत अनलाइन व्यापारको तालिम दिने गर्दथे । 

नेपाली नागरिकलाई उनीहरूको बैंक खाता प्रयोग गर्न दिएबापत मासिक १० हजार रुपैयाँ दिने गर्दथे । उनीहरूको खाताको कारोबार भने उनीहरूले नै चलाउँदै आएको प्रहरीले जनाएको छ । मुख्य सहयोगी अर्जुन भने पैसा ओसारपसारको काम पनि गर्दथे । प्रहरीले थप पीडितहरूको खोजी गरी अनुसन्धान अघि बढाएको छ । सो समूहले करोडौँ ठगी गरेको प्रहरी आशंका छ । 

अनलाइन व्यापार गर्दा सजग हुन पनि प्रहरीले सर्वसाधारणलाई आग्रह गरेको छ । सम्बन्धित कम्पनी तथा वेबसाइटको आधिकारिता बुझेर मात्र कारोबार गर्नुपर्ने एसएसपी केसी बताउँछन् । उनीहरूबाट १२ वटा ल्यापटप, ७७ मोबाइल, ७२ वटा सिमकार्ड तथा चार लाख नगद प्रहरीले बरामद गरेको छ । बुढानीलकण्ठ र चन्डोलमा गोप्य कार्यालय राखेर उनीहरूले ठगी गर्दै आएका थिए । 

अवैध विदेशीमाथि छैन अनुगमन 
पक्राउ परेका पाँच चिनियाँसँग पासपोर्ट भेटिएको छैन भने तीनजनाको तीन महिनाअघि नै भिसाको अवधि सकिएको छ । तर, उनीहरूमाथि अध्यागमन विभागको कुनै निगरानी थिएन । भिसाको अवधि सकिएका विदेशीको विवरण अध्यागमनसँग भए पनि त्यस्ता विदेशीमाथि निगरानी गर्ने प्रणाली छैन । यही कारण नेपालमा अवैध गतिविधिमा विदेशहरूको चलखेल बढेको प्रहरी अधिकारी बताउँछन् । यसअघि अपराधकै उद्देश्य लिएर नेपाल आएका विदेशीहरू पटक–पटक पक्राउ पर्दै आएका छन् । चिनियाँ नागरिक त पर्यटक भिसामा लामो समय नेपाल बसेर अवैध गतिविधिमा सक्रिय हुने गरेका छन् ।