- वि.सं २o७९ चैत ८ बुधबार
लुम्बिनी प्रदेश सभाका स्वतन्त्र सांसद सुरुल पुनले माओवादी केन्द्र रोजेका छन्। उनले मंगलबार माओवादी केन्द्र संसदीय दलको कार्यालयलाई पत्र पठाउँदै माओवादी केन्द्र रोजेको बताएका हुन्। उनी रुकुम पूर्वको क्षेत्र नं. १ बाट स्वतन्त्र उम्मेदवारी दिएर विजयी भएका थिए । तत्कालीन गठबन्धनका साझा उम्मेदवार तेजबहादुर वलीलाई हराउँदै पुन विजयी भएका हुन् ।
उनले माओवादी केन्द्रबाट विद्रोह गरी स्वतन्त्र उम्मेदवारी दिएको र पुनः माओवादी केन्द्रमै फर्किएको जानकारी गराए। उनले संसदीय दलका नेता जोखबहादुर महरालाई उक्त निवेदन पेस गरेका हुन्। यसअघि रोल्पाबाट निर्वाचित स्वतन्त्र सांसद दीपेन्द्र पुनले पनि माओवादी केन्द्र रोजेका थिए ।
उनले पनि गठबन्धनका उम्मेदवारविरुद्ध उम्मेदवारी दिएका थिए। उनले गठबन्धनका उम्मेदवार कांग्रेसका अमर पुनलाई हराएका थिए। योसँगै लुम्बिनीमा माओवादी केन्द्रका सांसदको संख्या ११ पुगेको छ ।
