श्रीमानको मृत्युको खबर सुनेपछि श्रीमतीको पनि मृत्यु, तीन छोरीहरूको बिचल्ली

धनकुटाको महालक्ष्मी नगरपालिका– १, कटहरेमा श्रीमान्–श्रीमतीको अचानक मृत्यु भएपछि तीन छोरीहरू बिचल्लीमा परेका छन् । महालक्ष्मी नगरपालिका– १, कटहरेका ४३ वर्षीय डम्बर मगर र उनकी श्रीमती ३४ वर्षीया विद्या मगरको मृत्यु भएपछि उनीहरूका तीन छोरी बिचल्लीमा परेका हुन् ।

वैदेशिक रोजगारीको सिलसिलामा कुवेतमा रहेका डम्बर मगरको १० दिनअगाडि विषाक्त मदिरा सेवनका कारण मृत्यु भयो । पतिको मृत्युको खबर सुनेलगत्तै बेहोस भएकी उनकी पत्नी विद्याको पनि तीन दिनपछि मृत्यु भएको थियो । बुबाआमाको अचानक मृत्यु भएपछि छोरीहरू १७ वर्षीया विपना, १६ वर्षीया सञ्जु र दुई वर्षीया संयुक्त मगरको बिचल्ली भएको मृतकको भाइ तथा वडासदस्य घनेन्द्र मगरले बताए। 

वैदेशिक रोजगारीको आम्दानीबाट जीविकोपार्जन गर्दै आएका मगर परिवारको कमाउने व्यक्तिको नै मृत्यु भएपछि आर्थिक समस्या परेको छ । दुई वर्षअघि कुवेत गएका डम्बरका जेठी र माइली छोरी धनकुटा नगरपालिका–५ तल्लोटुँडिखेलमा रहेको गोकुण्डेश्वर बालमन्दिर विद्यालयमा क्रमशः कक्षा १२ र ११ मा पढ्दै आएका थिए भने कान्छी छोरी मात्र दुई वर्षकी छिन् । तर, बुबाआमाको नै मृत्यु भएपछि छोरीहरूको लालनपालन तथा पठनपाठनमा समेत समस्या भएको मृतकको भाइ घनेन्द्रले बताए । उनले बिचल्लीमा परेका छोरीहरूको पालनपोषणका लागि सहयोग गर्नका लागि सहयोगी दाताहरूसँग आग्रहसमेत गरे ।

बुबाआमाको मृत्यु भएपछि उनका दुई छोरी जेठी र माइली अहिले धार्मिक परम्पराअनुसार किरिया बसेका छन् । यता डम्बरको शव भने अहिलेसम्म विदेशमा नै छ । उनको शवलाई नेपाल ल्याउने पहल भइरहेको छ । डम्बर र विद्या श्रीमान्–श्रीमतीको अचानक एकसाथ मृत्यु भएपछि वडा अहिले शोकमा डुबेको महालक्ष्मी नगरपालिका– १ का वडाध्यक्ष टेकबहादुर गुरुङले बताए ।

मगरदम्पतीको अचानक मृत्यु भएपछि उनीहरूको तीन छोरीको पुनर्स्थापनाका लागि दाताको खोजी गर्नुको साथै स्थानीय स्तरमा माइली छोरीको नाममा बैंक खाता खोलेर फन्ड कलेक्सनको काम सुरु गरिएको वडाध्यक्ष गुरुङले बताए । कुवेतमा विषाक्त मदिरा सेवनको कारण २२ जनाभन्दा धेरै नेपालीको मृत्यु भएको थियो भने अहिले पनि धेरै नेपालीको कुवेतको विभिन्न अस्पतालमा उपचार भइरहेको छ ।