- वि.सं २o८२ भदौ १३ शुक्रबार
कञ्चनपुरको बेलडाँडी गाँउपालिका २ सिहपाल टोलकी सम्झना भट्ट मृत्यु प्रकरणमा उनका श्रीमान पवन भट्ट जेल चलान भएका छन्। सम्झनाका माइती पक्षले जिल्ला प्रहरी कार्यालयमा दिएको दुरुत्साहन सम्बन्धी मुद्दाको बिहीबार अदालतमा भएको छुनछेक बहसबाट पवन भट्ट पुर्पक्षका लागि कारागार चलान भएका हुन् भने सासु किरण भट्ट साधारण तारेख र ससुरा हरिदत्त भट्ट र दिदी सासु पुजा भट्ट धरौटी बुझाएर रिहा भएको अदालतले जनाएको छ ।
जिल्ला अदालत कञ्चनपुरका सुचना अधिकारी राजेन्द्र बहादुर चन्दले न्यायाधिश राजेन्द्र भण्डारीको एकल इजलासबाट सम्झनाका श्रीमानलाई पुर्पक्षका लागि कारागार चलान, सासु किरणलाई साधारण तारेख, ससुुरा हरि र दिदी पुजाबाट जनही एक/एक लाख धरौटी लिन आदेश भएको बताए ।
सो आदेश अनुरुप हरि र पुजा पनि रिहा भएका छन्। १९ फागुन ०८१ मा विवाह बन्धमा बाँधिएकी सम्झना १८ साउन ०८२मा घरभित्रै झुण्डिएर मृत फेला परेकी थिइन् । बेलडाँडीका पवन र महेन्द्रनगरकी सम्झानाबिच पहिल्यैदेखि प्रेम सम्बन्ध रहेकाले सम्झनाको १७ वर्षकै उमेरमा विवाह भएको थियो । छोरीको विवाहको उमेर नपुग्दै किन विवाह गरिदियो भन्दै अहिले समाजिक स्तरमा माइती पक्षमाथि पश्न उठिरहेको छ। उक्त घटनाबाट उमेर नपुग्दै छोरीको विवाह गर्न नहुने समेत बहस भइरहेको छ ।
