यमनको इन्धन बन्दरगाहमा अमेरिकी आक्रमण, ५८ जनाको मृत्यु

अमेरिकी सेनाले यमनको हुथी विद्रोहीलाई लक्षित गरी शुक्रबार गरेको आक्रमणमा कम्तीमा ५८ जनाको मृत्यु भएको हुथी समूहनिकट अल मसिराह टिभीले जनाएको छ। आक्रमणमा कम्तीमा १२५ जना घाइते भएका छन्।

आक्रमणपछि दिइएको प्रारम्भिक जानकारीमा आक्रमणबाट हुथी समूहको नियन्त्रणमा रहेको इन्धन बन्दरगाह ध्वस्त भएको र कम्तीमा २० जनाको मृत्यु भएको बताइएको थियो।

रास इसा इन्धन बन्दरगाहमा भएको आक्रमणको उद्देश्य इरान समर्थित हुथी विद्रोहीका लागि आपूर्ति र कोषको स्रोत बन्द गर्नु रहेको अमेरिकी सेनाले जनाएको छ।

रेड सी र एडेनको खाडीमा रहेका असैन्य पानीजहाज र सैन्य जहाजमाथिको आक्रमणलाई अन्त्य गर्न सकियोस् भनी वासिङ्टनले मार्च १५ देखि हुथी विद्रोहीमाथि दैनिकजसो हवाई आक्रमण गर्दै आएको छ।

विद्रोहीहरूले सन् २०२३ को अन्त्यतिर गाजामा प्यालेस्टिनीहरूप्रति ऐक्यबद्धता जनाउँदै आक्रमण सुरु गरेका थिए। इजरायली सेनाले अमेरिकी आक्रमणपछि यमनबाट आउँदै गरेको क्षेप्यास्त्रलाई रोकेको शुक्रबार जनाएको छ।

अमेरिकी सेन्ट्रल कमान्ड (सेन्टकम)ले जारी गरेको विज्ञप्तिमा भनिएको छ, ‘अमेरिकी सेनाले इरानसमर्थित हुथी आतंककारीका लागि इन्धनको यो स्रोतलाई समाप्त गर्न र उनीहरूलाई अवैध राजस्वबाट वञ्चित गर्न कदम चालेको छ। यी आक्रमणको उद्देश्य हुथीको शक्तिको आर्थिक स्रोतलाई कमजोर पार्नु रहेको छ। हुथीले यमनमा शोषण जारी राखेका छन् र आफ्नो विरोधी यमनी नागरिकहरूलाई समेत ठुलो पीडा दिइरहेका छन्।’

हुथी स्वास्थ्य मन्त्रालयका प्रवक्ता अनिस अलासबाहीले पाँचजना प्यारामेडिक्ससहित २० जनाको मृत्यु भएको पुष्टि भए पनि मृतकको संख्या योभन्दा निकै बढी भएको बताए।

‘अमेरिकी आक्रमणपछि रास इसा तेल बन्दरगाह आक्रमणमा कम्तीमा ५० जना कामदार र कर्मचारीहरू घाइते भएका छन्,’ उनले सामाजिक सञ्जाल एक्समा जारी सन्देशमा उल्लेख छ।