तेस्रो नेपाल सुपर लिगका सात मार्की खेलाडी

नेपाल सुपर लिग (एनएसएल)को तेस्रो संस्करणका सात खेल सम्पन्न भइसकेका छन् । सात टोली सहभागी लिगमा विदेशी खेलाडी संख्या ६ पुर्‍याएपछि मैदानभित्रको माहोल तात्तातो छ । हरेक खेल निकै रोमाञ्चक बनेका छन् । तर, दर्शकको उपस्थिति भने निराशाजनक छ । चौधरी ग्रुपको स्वामित्वमा रहेको नेपाल स्पोर्टस् एन्ड इभेन्ट म्यानेजमेन्ट कम्पनीले प्रचारमा ध्यान दिएको देखिँदैन ।

 लिगको तेस्रो संस्करण आइपुग्दा तीन क्लबले नाम फिर्ता लिइसकेका छन् । पहिलो संस्करण खेलेको विराटनगर सिटी एफसी दोस्रो संस्करणमा देखिएन । दोस्रो संस्करणमा जोडिएका स्पोर्टिङ डी मेची र वीरगन्ज युनाइटेडले यसपटक नखेल्ने निर्णय गरे । आयोजकको स्पष्ट नीति नहुँदा तेस्रो सिजन नखेलेको उनीहरूको धारणा छ । 

नियमित डिभिजन लिग नहुने र घरेलु फुटबलको क्यालेन्डरसमेत अस्तव्यस्त हुँदा खेलाडी बिदेसिने क्रम रोकिएको छैन । उल्टो बढ्दो छ । आशाको किरण मानिएको एनएसएल पनि कहिले हुने या नहुने टुंगो लागेको छैन । सन् २०१९ बाट सुरु भएको लिग तेस्रोपटक भइरहेको छ । तेस्रो संस्करणको एनएसएल हुँदा विदेशीसहित करिब तीन सयभन्दा बढी खेलाडी र खेलकर्मीले रोजगारी पाएका छन् । सहभागी टिमले मार्कीमा भने नयाँ अनुहार अनुबन्ध गरेका छन् । यसअघि मार्की रहेका अनन्त तामाङ र अञ्जन विष्ट मात्रै पुराना खेलाडी हुन् । पोखराका समीरले त पहिलोपटक एनएसएल खेल्दै छन् । 

अनन्त तामाङ : ललितपुर सिटी एफसी 
साबिक विजेता ललितपुर सिटी एफसीले मार्कीमा अनन्त तामाङलाई नै निरन्तरता दियो । अक्सन हुने अघिल्लो रात मात्रै ललितपुरले मार्की पक्का गरेको हो । दोस्रो संस्करण टोली च्याम्पियन बन्दा अनुभवी डिफेन्डर अनन्त नै मार्की थिए । टोली अनन्तको कप्तानीमा उपाधि रक्षा गर्ने योजनामा छ । अनन्तले दोस्रो संस्करणमा ११ खेल नै पूरा समय खेले । त्यसैले पनि भाटभटेनी सुपरमार्केटको स्वामित्वमा रहेको ललितपुरले झापाली अनन्तलाई टिममै राख्यो । अनन्तसँग नेपालको विभिन्न उमेर समूहसँगै बेल्जियममा प्रशिक्षण गरेको, भारतीय क्लब इस्ट बंगालबाट खेलेको अनुभव छ । अनन्तको कप्तानीमा चर्च ब्वाइज युनाइटेडले पहिलो सहभागितामै सहिद स्मारक ‘ए’ डिभिजन लिगको उपाधि जितेको छ । ललितपुरले अनन्तसँगै डिफेन्डर सनिश श्रेष्ठ र मिडफिल्डर आदित्य शाक्यलाई रिटेन गरेको छ । अनन्तअघि पहिलो संस्करणमा ललितपुरको मार्कीमा अञ्जन विष्ट थिए । 

अञ्जन विष्ट :  एफसी चितवन 
राष्ट्रिय टिममा नयाँ कीर्तिमान बनाउने मार्गमा रहेका अट्याकर अञ्जन विष्टलाई एफसी चितवनले मार्की बनाएको छ । अञ्जनले फरक तीन संस्करण नै फरक क्लबबाट खेल्दै छन् । कोभिड–१९ को समयमा पहिलोपटक भएको फ्रेन्चाइज लिगमा अञ्जन ललितपुर सिटीका मार्की थिए । दोस्रो संस्करणमा भने झापा एफसीमा पुगे । यसपटक उनी महँगो मूल्यमा आइएमई ग्रुपको स्वामित्वमा रहेको चितवन पुगेका हुन् । राष्ट्रिय टिमका सहकर्मी अधिकांश अस्ट्रेलियालगायत देशमा पलायन भए पनि अञ्जन भने फुटबलमै केन्द्रित छन् । उनी तत्काललाई हरि खड्का र नीराजन रायमाझीको नाममा रहेको १३ गोलको कीर्तिमान तोड्ने दाउमा छन् । एफसी चितवन पनि यसपटक अञ्जनको कप्तानीमा पहिलोपटक प्लेअफमा पुग्ने दाउमा छ । गत सिजन टिमको मार्की तथा कप्तान रहेका गोलकिपर विशाल श्रेष्ठ पनि चितवनमै रिटेन भएका छन् । 

कृतिशरत्न छुन्जू : धनगढी एफसी 
कृतिशरत्न छुन्जू एनएसएलका लागि नयाँ नाम होइन । तर, मार्की खेलाडीमा भने यो नयाँ नाम हो । नेपालको उमेर समूह र राष्ट्रिय टिममा स्थान बनाइसकेका कृतिशलाई धनगढीले तेस्रो संस्करणका लागि मार्की बनाएको छ । दोस्रो सिजन पनि धनगढी उपविजेता हुँदा टोलीको मार्की आशिष चौधरी थिए । हाल आशिषसँगै पहिलो संस्करणका मार्की विशाल श्रेष्ठ अस्ट्रेलिया छन् । दोस्रो संस्करणका कृतिशले धनगढीका लागि पहिलो खेलमा वीरगन्जविरुद्ध ९० मिनेट नै खेले । त्यसपछि उनी टिमको लिस्टमै रहेनन् । पछिल्लो सहिद स्मारक ‘ए’ डिभिजन लिगमा भने उनी न्युरोड टिम एनआरटीका लागि खेलेका हुन् । कृतिश धनगढीका लागि फरक तीन संस्करणमा मार्की हुने खेलाडी बनेका छन् । लगातार दुईपटक उपविजेता भएको धनगढी कृतिश मार्की रहँदा च्याम्पियन बन्ने योजनामा छ । टोलीका कप्तानमा अनुभवी देवेन्द्र तामाङ छन् । यसपटक धनगढीस्तरीय विदेशी खेलाडी भित्र्याउँदै च्याम्पियन बन्ने लक्ष्यमा छ । 

लाकेन लिम्बू :  झापा एफसी 
गत सिजनका मार्की अञ्जन विष्ट चितवन पुगेपछि झापाले लाकेन लिम्बूलाई मार्की घोषणा गरेको छ । युवा प्लेमेकर भारतीय आइलिग क्लब दिल्ली एफसीमा अनुबन्ध थिए । आइलिगपछि उनी पहिलो खेलमै झापासँग खेल्न दशरथ रंगशालामा उपस्थित भए । दोस्रो सिजनमा पनि लाकेन झापामै थिए । तर, घाइते हुँदा खेल नै खेल्न पाएनन् । त्यस अर्थमा लाकेनका लागि तेस्रो एनएसएल डेब्यु हुनेछ । उमेर समूह हुँदै सहिद स्मारक ‘ए’ डिभिजन लिगमा लाकेनले थ्री स्टारबाट खेलेका छन् । पहिलो संस्करणमा स्पेनिस प्रशिक्षकसहित दुई स्पेनिस खेलाडी टिममा भित्र्याएको झापाको प्रदर्शन राम्रो हुन सकेन । दोस्रो संस्करणबाट एनएसएलमा जोडिएको झापाको पहिलो लक्ष्य नै प्लेअफ हुनेछ । त्यही योजनाअनुसार झापाले राष्ट्रिय टिमबाट खेलिसकेका छिरिङ लामा र उदीयमान खेलाडी प्रशान्त लक्षमलाई रिटेन गरेको थियो ।

मनीष डाँगी : बुटवल लुम्बिनी
दक्षिण कोरियाको एकेडेमीमा हुर्किएपछि मनीष डाँगी नेपाली फुटबलमा भित्रिएका हुन् । नागरिकता बनाउन आउँदा खाली समयमा उनले सहिद स्मारक ‘सी’ डिभिजन लिगमा खालीबारी युवा क्लबका लागि खेले । सी डिभिजनको प्रदर्शनले उनको यात्रा नेपालको यू–१८ र यू–१९ हुँदै राष्ट्रिय टिमसम्म पुग्यो । यहीबिचमा विराटनगर सिटी एफसीले पहिलो संस्करणमा ट्यालेन्ट हन्टबाट मनीषलाई टिममा भित्र्यायो । मनीषले प्रभावशाली प्रदर्शन गर्दै सबैको मन जिते । त्यसपछि मनीषले पछाडि फर्केर हेर्नुपरेको छैन । ‘सी’ डिभिजन लिगपछि सीधै ‘ए’ डिभिजन लिग खेले । उनी दक्षिण कोरियामा परिवारको व्यवसायलाई त्यागेर फुटबलमै केन्द्रित छन् । उनै मनीष बुटवल लुम्बिनीको मार्की नियुक्त भएका छन् । पहिलो सिजन गोलकिपर विशाल श्रेष्ठलाई मार्की बनाएको बुटवल लुम्बिनीले मालिक परिवर्तनसँगै दोस्रो सिजन एरिक विष्टलाई मार्की बनाएको थियो । कप्तानी जिम्मावरी भने बुटवलले एरिकलाई दिएर रिटेन गरेको छ । 

रोहन कार्की : काठमाडौं रेजर्स
मनीष डाँगीपछि सीधै सहिद स्मारक ‘सी’ डिभिजन लिग खेलेर राष्ट्रिय टिममा स्थान बनाउने खेलाडी हुन्, रोहन कार्की । रोहनले आफ्नो आइडल रोहित चन्दका लागि ‘आरसी ३२’ बाट ‘सी’ डिभिजन लिग खेलेका हुन् । पछिल्लो युवापुस्तामा रोहनको प्रदर्शन प्रभावशाली रहेको छ । यी भद्र खेलाडीलाई पहिलो संस्करणको च्याम्पियन काठमाडौं रेजर्सले तेस्रो सिजनलाई मार्की बनाएको छ । यसअघि झापा कनकाईका रोहनले धनगढीबाट १० खेल नै खेलेका थिए । तीन खेलमा ९० मिनेट नै खेले, त्यसैले उदीयमान खेलाडीको अवार्ड नै प्राप्त गरे । यता काठमाडौंले फरक तीन संस्करणमा तीन मार्की बनाएको छ । पहिलो संस्करणमा गोलकिपर विकेश कुथू र दोस्रो संस्करणमा अस्ट्रेलिया पुगेका स्ट्राइकर हिसुब थपलियालाई मार्की बनाएको थियो । 

समीर तामाङ : पोखरा 
पछिल्लो समय राष्ट्रिय टिमका ६० भन्दा बढी खेलाडी विदेश पलायन हुँदा समीर तामाङ भाग्यमानी बन्न सफल भएका छन् । अनुभवी खेलाडी अस्ट्रेलियालगायत देश पुग्दा तेस्रो संस्करणको एनएसएलमा खेलाडी अभाव छ । त्यसको फाइदा समीरलाई पुग्यो । नेपालको यू–२० टिमबाट खेलेका समीरलाई हालसम्म ठुलो लिग खेलेको अनुभव नै छैन । उनी सहिद स्मारक ‘बी’ डिभिजन लिग खेल्ने तयारीमा थिए । ‘ए’ डिभिजन लिगको स्वाद उनले चाख्नै पाएका छैनन् । पहिलोपटक फ्रेन्चाइज लिग खेल्दै छन् । राष्ट्रिय टिमबाट खेलेपछि उनको चर्चा र प्रदर्शनले सही दिशा लिएको छ । समीर टिमको मार्की रहेपछि पहिलो संस्करण ट्यालेन्ट हन्ट र दोस्रोमा मार्की रहेका आयुष घलानले टोलीको कप्तानी आर्म ब्यान्ड लगाएका छन् ।