बंगलादेशी कपडा उद्योगमाथि ३७ प्रतिशत कर

 बंगलादेशी कपडा उद्योगसम्बद्ध उद्यमीहरूले बिहीबार अमेरिकी भन्सार करले विश्वको दोस्रो ठुलो गार्मेन्ट उत्पादक बंगलादेशलाई ‘ठुलो धक्का’ पु¥याएको बताएका छन् । आरडिएम ग्रुपका अध्यक्ष रकिबुल आलम चौधरीले करवृद्धिका कारण मूल्यमा हुने वृद्धिले मागलाई प्रभावित गर्ने बताए । ‘हामी खरिदकर्ता गुमाउनेछौँ । क्रेताहरू अन्य लागत–प्रतिस्पर्धी बजारमा जानेछन् । यो कदम हाम्रो उद्योगका लागि ठुलो धक्का हुनेछ,’ चौधरीले भने । 

अमेरिकी राष्ट्रपति डोनाल्ड ट्रम्पले बुधबार बंगलादेशमा कपासमा १६ प्रतिशत र पोलिस्टर उत्पादनमा ३२ प्रतिशत कर वृद्धि गर्दै समग्रमा ३७ प्रतिशत कर वृद्धि गर्ने घोषणा गरेका छन् । बंगलादेशले संयुक्त राज्य अमेरिकामा वार्षिक ८.४ अर्ब अमेरिकी डलरबराबरको तयारी कपडा निर्यात गर्ने गरेको बंगलादेश गार्मेन्ट म्यानुफ्याक्चरर्स एन्ड एक्सपोर्टस एसोसिएसन (बिजिएमइए) को तथ्यांकले देखाएको छ । यो बंगलादेशको कुल तयारी पोसाक निर्यातको करिब २० प्रतिशत हो । 
‘हामी करवृद्धिका लागि तयार थिएनौँ । यो अचानक आएको छ,’ बिजिएमइएका प्रशासक अनवर हुसेनले भने । हुसेनले अन्य क्षेत्रीय व्यापार प्रतिद्वन्द्वीको अवस्था अझ खराब रहेको बताए । ‘चीन, भियतनाम र श्रीलंकाजस्ता हाम्रा प्रतिस्पर्धीको तुलनामा हामी अझै राम्रो अवस्थामा छौँ । उनीहरूलाई हामीलाई भन्दा बढी कर लगाइएको छ,’ हुसेनले भने ।

बंगलादेशका अन्तरिम नेता मोहम्मद युनुसका प्रेस सचिव सफिकुल आलमले सरकारले समाधान खोजिरहेको बताए । ‘राष्ट्रिय राजस्व बोर्डले शुल्कलाई छिटो तर्कसंगत बनाउने विकल्पको पहिचान गरिरहेको छ । यो अमेरिकी करवृद्धिको विषयलाई सम्बोधन गर्न आवश्यक छ,’ आलमले एक विज्ञप्तिमा भने । चीनपछि दोस्रो ठुलो कपडा उत्पादक बंगलादेशले फ्रान्सको क्यारेफोर, क्यानडाको टायर, जापानको युनिक्लो, आयरल्यान्डको प्रिमार्क, स्विडेनको एच एन्ड एम र स्पेनको जाराजस्ता विश्वव्यापी ब्रान्डका लागि कपडा उत्पादन गर्छ । बंगलादेशको कपडा उद्योगले सन् २०२४ मा ३६ अर्ब डलर निर्यात गरेको थियो भने त्यसअघिको वर्ष ३८ अर्ब डलर निर्यात गरेको थियो ।