- वि.सं २o८१ चैत २२ शुक्रबार
थाइल्यान्डको औपचारिक भ्रमणमा रहेका प्रधानमन्त्री केपी ओलीले नेपालमा लगानी गर्न थाई व्यवसायीलाई आग्रह गरेका छन् । बिहीबार नेपाली व्यवसायी प्रतिनिधिमण्डलसमेत उपस्थिति भएको भेटवार्तामा उनले नेपाल लगानीका लागि उर्वर भूमि भएको जानकारी गराउँदै लगानीका लागि आग्रह गरेका हुन् । प्रधानमन्त्री ओलीले थाई व्यवसायीलाई नेपालमा लगानीमैत्री वातावरण निर्माणका लागि थुप्रै कानुन संशोधन तथा परिमार्जन गरेको पनि जानकारी गराए । ‘सरकार लगानी सुरक्षाको प्रत्याभूति गर्न प्रतिबद्ध छ, उनले भने, ‘तपाईंहरूले नेपालको निजी क्षेत्रसँग सहकार्य गरेर नेपालमा लगानी गर्न सक्नुहुन्छ ।’
भ्रमणदलमा सहभागी नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा कानुन सुधार गर्दै लगानीमैत्री वातावरण निर्माण भएको, विदेशी मुद्रा सञ्चिति राम्रो रहेको र लगानीका लागि सहज वातावरण भएको जानकारी गराए । उनले उत्पादनपछिको बजारका लागि भारत र चीनजस्ता ठुलो जनसंख्या भएका छिमेकी देशहरू भएको नेपालमा लगानी गर्दा फाइदा लिन सकिनेमा पनि थाई व्यवसायीलाई आश्वस्त गराए । नेपालमा पर्यटन, ऊर्जा, कृषि, सूचना प्रविधि तथा निर्माणजन्य उद्योगमा पर्याप्त सम्भावना रहेको उनको भनाइ थियो ।
‘नेपाल लगानीका लागि पर्याप्त सम्भावना भएको देश हो, पछिल्लोपटक सरकारले गरेका नीतिगत सुधारले बाह्य लगानीलाई आकर्षित गर्ने अवस्था छ,’ अध्यक्ष ढकालले भने, ‘निजी क्षेत्रको तर्फबाट पनि म थाई व्यवसायीलाई लगानीका लागि आग्रह गर्दछु ।’ नेपाल र थाइल्यान्डबिच बुधबार मात्र दुईवटा सरकारी र ६ वटा गैरसरकारी गरी आठवटा सम्झौतामा हस्ताक्षर भएको छ ।
