- वि.सं २o८२ बैशाख ६ शनिबार
परराष्ट्रमन्त्री डा. आरजु राणा देउवा भोलि थाइल्यान्डको राजधानी बैंकक जाने भएकी छिन्। २१ देखि २५ अप्रिलसम्म बैंककमा आयोजना हुने संयुक्त राष्ट्रसंघीय एसिया तथा प्रशान्त क्षेत्रीय आर्थिक तथा सामाजिक आयोग (युनाइटेड नेसन्स् इकोनोमिक एन्ड सोसियल कमिसन फर एसिया एन्ड द प्यासिफिक, युएनस्केप) को ८१औँ सत्रमा सहभागी हुन उनी बैंकक जान लागेकी हुन्।
नेपाल हाल युएनस्केपको अध्यक्ष छ। मन्त्री डा. राणाले युएनस्केपको ८१औँ सत्रको अध्यक्षता गर्ने कार्यतालिका छ। उक्त सत्रलाई मन्त्री डा. राणाले नेपालका तर्फबाट सम्बोधन गर्ने कार्यक्रम छ।
यस सत्रको विषयवस्तु एशिया तथा प्रशान्त क्षेत्रमा दिगो सहरी विकासका लागि क्षेत्रीय सहयोग रहेको छ। उक्त सत्रमा मन्त्री डा. राणाको नेतृत्वमा परराष्ट्र मन्त्रालय, राष्ट्रिय योजना आयोग र थाइल्यान्डस्थित नेपाली दूतावासका अधिकारीहरू सम्मिलित नेपाली प्रतिनिधिमण्डल सहभागी हुने कार्यक्रम छ।
