- वि.सं २o७८ श्रावण १७ आइतबार
कर्णाली नदीमा डुंगा पल्टिँदा तीनजना बेपत्ता भएका छन् । आइतबार दिउँसो ११ः०० बजे कैलाली मोहन्याल गाउँपालिका– ३ राँगा मलेखाबाट सुर्खेतको चौकुने गाउँपालिका– ४ मा जाने क्रममा डुंगा दुर्घटना भएको हो ।
आफ्ना बच्चालाई नियमित खोप लगाउन आउने क्रममा आइतबार कर्णालीमा डुंगा खसेको चौकुने गाउँपालिकाका स्वास्थ्य शाखा प्रमुख गगन पाण्डेयले जानकारी दिए । काठको डुंगामा १० जना सवार रहेको जिल्ला प्रहरी कार्यालय सुर्खेतले जनाएको छ । डुंगामा सवार १० जनामध्ये तीनजना बेपत्ता भएको जिल्ला प्रहरी कार्यालय सुर्खेतका प्रवक्ता प्रहरी नायव उपरीक्षक रामप्रसाद घर्तीले बताए ।
बेपत्ता हुनेमा कैलालीको मोहन्याल गाउँपालिका– ३ राघका उर्मिला सलामी, धनी सलामी र धनी सलामीका डेढ महिनाका छोरा रहेका छन् । डुंगा पल्टिँदा पाँचजनाको सकुशल उद्धार गरिएको प्रहरीले जनाएको छ । १९ वर्षीया धनसरा सलामी मगर गम्भीर घाइते छिन् भने एक महिनाका कर्ण सलामी सामान्य घाइते भएका छन् ।
हरेक महिनाको १७ गते बालबालिकालाई बिजौरा स्वास्थ्य चौकीमा खोप लगाइने गरिएको र मोहन्याल गाउँपालिका कार्यालयममा जान एक दिन लाग्ने र बिजौरा आउन आधा घन्टा लाग्ने भएका कारण राँगा मलेखाका सर्वसाधारणले सुर्खेतको बिजौराबाटै सेवा सुविधा लिने गरेको चौकुने गाउँपालिकाका स्वास्थ्य शाखा प्रमुख पाण्डेयले बताए ।
