तराईमा तस्करी बढेपछि एसपीसहित एकैपटक १६ कमान्डर हटाइए 

चाडपर्व नजिकिँदै गर्दा तराईका जिल्लामा तस्करी बढेको छ । तस्करीमा साँठगाँठ गरेको आरोपमा सशस्त्र प्रहरीले एसपीसहित एकैपटक १६ जना कमान्डरलाई जिम्मेवारीबाट हटाएर कारबाही प्रक्रिया थालेको छ ।  

सशस्त्र प्रधान कार्यालयले आइतबार एक एसपी, एक डिएसपी, सात इन्स्पेक्टर, ६ सइ र एक असइ गरी १६ जनालाई  कमान्डबाट हटाएको हो ।     सशस्त्र प्रहरी बल, नेपाल नं. ११ गण रौतहटका गणपति सशस्त्र प्रहरी उपरीक्षक सन्तोषकुमार बस्नेतलाई कमान्डरबाट फिर्ता गरेर सशस्त्र प्रहरी उपरीक्षक रामहरि अधिकारीलाई पठाइएको छ । चिनी गोदाममा छापा हान्दा चिनी नै गायब बनाएको आरोप उनीमाथि छ । 

यसैगरी, बारा जिल्लास्थित सशस्त्र प्रहरी बल, नेपाल बोर्डर आउट पोस्ट कबहीगोठका सशस्त्र प्रहरी निरीक्षक जीवनलाल बुढा, बिओपी झिटकैया बाराका सशस्त्र प्रहरी नायब निरीक्षक केदारबहादुर परियार, फरवार्ड सुरक्षा बेस बलिरामपुरका सशस्त्र प्रहरी नायब निरीक्षक हरिप्रसाद लम्साल, फरवार्ड सुरक्षा बेस छतवा बाराका सशस्त्र प्रहरी नायब निरीक्षक गणेश गिरी र झरखोर पोस्ट बाराका सशस्त्र प्रहरी सहायक निरीक्षक शिवशंकरप्रसाद चौधरीलाई जिम्मेवारीबाट हटाइएको सशस्त्र प्रहरी बल, प्रधान कार्यालयले जनाएको छ । 

यस्तै, पर्सा जिल्लास्थित बोर्डर आउट पोस्ट प्रसौनी भाठ्ठाका सशस्त्र प्रहरी निरीक्षक सञ्जीव बानियाँ क्षेत्री, बिओपी दक्षिण झिटकैयाका सशस्त्र प्रहरी निरीक्षक नरेश सुवाल बाटा, सुरक्षा बेस बहुअर्वाभाठाका सशस्त्र प्रहरी नायब निरीक्षक भीमबहादुर क्षेत्री र फरवार्ड सुरक्षा बेस जयमंगलापुरका सशस्त्र प्रहरी नायब निरीक्षक झक्कुप्रसाद ओलीलाई पनि जिम्मेवारीबाट हटाइएको छ । 

पश्चिम नवलपरासी जिल्लास्थित बोर्डर आउट पोस्ट भुजहवाका सशस्त्र प्रहरी निरीक्षक रूपक नापित र कैलाली जिल्लास्थित प्रस्तावित सीमा सुरक्षा गुल्म खोनपुका सशस्त्र प्रहरी नायब उपरीक्षक नवीन चन्द, बोर्डर आउट पोस्टछ कुसुमघाटका सशस्त्र प्रहरी निरीक्षक रामशरण विष्ट, बिओपी फूलबारीका सशस्त्र प्रहरी निरीक्षक खगेन्द्रबहादुर चन्द, बिओपी लल्लिपुरका सशस्त्र प्रहरी नायब निरीक्षक मोहन राम मोहर र कञ्चनपुर जिल्लास्थित बोर्डर आउट पोस्ट डोकेबजारका सशस्त्र प्रहरी निरीक्षक सूर्यप्रकाश पन्तलाई समेत जिम्मेवारीबाट हटाइएको हो ।

सशस्त्र प्रहरी प्रधान कार्यालयले गोप्य रूपमा तराईका जिल्लाहरूमा अनुगमन टोली खटाएकोमा अनुगमन प्रतिवेदनका आधारमा उनीहरूलाई हटाएको हो। सीमा क्षेत्रमा कार्यरत कमान्डरहरूलाई मुख्यालयबाट समेत सूक्ष्म रूपमा निगरानी बढाइएको सशस्त्र प्रहरी प्रधान कार्यालयले जनाएको छ । 

पछिल्लो समय तराईका जिल्लामा तस्करी बढेको सूचना माथिल्लो निकायमा पुगेको छ । खासगरी राजनीतिक पावर लगाएर सीमा क्षेत्रमा गएका कमान्डरहरूले संस्थागत तस्करी गराएको आरोप लागेको छ । 

संस्थागत तस्करीमा नेपाल प्रहरीका अधिकारीको समेत मिलेमतो हुने गरेकोमा प्रहरीतर्फका भने कोही कारबाहीमा परेका छैनन्।