- वि.सं २o८२ भदौ १३ शुक्रबार
सामुदायिक स्तरबाट सञ्चालित सिराहाको लहानस्थित जे.एस. मुरारका बहुमुखी क्याम्पसमातहत रहेको जे.एस. मुरारका माविबाट ०८२ सालको कक्षा १२ को परीक्षामा उत्कृष्ट अंक ल्याएका तीनजना छात्रालाई प्रोत्साहनस्वरूप नगद रकम दिने घोषणा गरिएको छ ।
जे.एस. मुरारका माविको आयोजनामा शुक्रबार लहानमा आयोजित ‘शैक्षिक गुणस्तर’सम्बन्धी अन्तर्क्रियामा लहान नगरपालिकाका प्रमुख महेशप्रसाद चौधरीले तीन संकायमा उत्कृष्ट अंकसहित उत्तीर्ण तीन विद्यार्थीलाई नगद पुरस्कार दिने घोषणा गरेका हुन् । व्यवस्थापनतर्फ ३.३९ जिपिएसहित उत्कृष्ट अंक ल्याएकी चाँदनी गुप्ता, शिक्षामा ३.३८ जिपिएसहित आरतीकुमारी यादव र विज्ञान संकायतर्फ ३.२३ जिपिएसहित उत्कृष्ट रजनीकुमारी साहलाई नगरप्रमुख चौधरीले उच्च शिक्षा अध्ययनका लागि प्रोत्साहनस्वरूप जनही १० हजार रुपैयाँ नगद दिने घोषणा गरे । ‘तीन संकायमा उत्कृष्ट अंक ल्याएका तीनजनालाई मार्कसिट र अन्य प्रमाणपत्रसहित नगरपालिकाको शिक्षा शाखामा पठाइदिनुस्, तत्काल १० हजार रुपैयाँ नगद दिन्छौँ,’ उनले भने ।
जे.एस. मुरारका बहुमुखी क्याम्पस सञ्चालक समितिका अध्यक्षसमेत रहेका प्रमुख चौधरीले क्याम्पसको पूर्वविद्यार्थीको हैसियतले पनि आफू निर्वाचित भएपछि हरेक वर्ष क्याम्पसको शैक्षिक विकासका लागि एक करोड रुपैयाँ अक्षय कोषमा दिइरहेको बताए । ‘आफू नगरप्रमुख रहुन्जेलसम्ममा क्याम्पसको अक्षय कोषमा ६ करोड पुर्याउने लक्ष्य छ,’ उनले भने, ‘त्यो रकमको ब्याजले लहानसहित छिमेकी पालिकाहरूबाट आउने गरिब, विपन्न परिवारका विद्यार्थीलाई सहयोग र शिक्षक कर्मचारीको वृत्ति विकासमा योगदान पुग्छ ।’
विद्यार्थी पलायन रोक्न जोड
अन्तर्क्रियामा छिमेकी धनगढीमाई नगरपालिकाका प्रमुख शिवशंकर महतोले एसइईपछि विद्यार्थी सिराहा छोडेर अन्य ठाउँमा किन पलायन भइरहेका छन् भन्नेबारे गम्भीरतापूर्वक सोच्नुपर्ने वेला आएको बताए । ‘तराईबाट ठुला सहरमा गएर पढ्ने विद्यार्थीले राम्रै अंक ल्याउँछन्, तर तिनलाई जिल्लाकै शैक्षिक संस्थामा पढ्ने वातावरण किन बनाउन सकिरहेका छैनौँ,’ उनले भने, ‘यो कुरा हरेक समुदायमा पुगेर अभिभावकहरूलाई बुझाउन जरुरी छ, विद्यार्थी पलायन रोक्न सामूहिक पहल र प्रयास जरुरी छ ।’ आफ्नो पालिका क्षेत्रबाट जे.एस. क्याम्पस पढ्न आइरहेका विद्यार्थी कति संख्यामा छन्, कुन–कुन संकायको कुन तहमा अध्ययरत छन्, आर्थिक अवस्था कस्तो छ जस्ता विषयमा सर्वेक्षण गरी आर्थिक वर्ष ०८२/८२ को बजेट पारित गर्ने वेलामा छात्रवृत्तिको व्यवस्था गर्न सकिने उनले बताए ।
छिमेकी सप्तरीको सुरुंगा नगरपालिकाकी प्रमुख गीता चौधरीले जिल्ला अलग भए पनि बिहानदेखि बेलुकासम्मको दैनिक काम, किनमेल, आर्थिक कारोबार सबै लहानसँग जोडिएकाले नगरपालिकाले जे.एस. मा १०+२, स्नातक र स्नातकोत्तर पढ्ने विद्यार्थीसहित दलित छात्राहरूलाई प्रोत्साहनका लागि छात्रवृत्ति दिइरहेको बताइन् ।
क्याम्पस प्रमुख सञ्जयकुमार चौधरीले विश्वविद्यालय अनुदान आयोगको गुणस्तर सुनिश्चितता तथा प्रत्यायनकृत २०७६ अन्तर्गत पुरस्कृत भएको जे.एस. मुरारका बहमुखी क्याम्पसमा प्रायः विपन्न, गरिब, ग्रामीण भेगका विद्यार्थीले क्याम्पसले दिने छात्रवृत्तिका अलावा अनुदान आयोग, मधेश प्रदेश शिक्षा निर्देशनालयबाट प्राप्त हुने छात्रवृत्तिसमेत पाइरहेको उल्लेख गरे । ‘मा.वि. तह र क्याम्पसको शैक्षिक गुणस्तरका लागि नियमित अनुगमन, भौतिक पूर्वाधारको विकाससँगै शिक्षकहरूका लागि समयानुकूल तालिमको व्यवस्था गरिनुपर्छ,’ उनले भने ‘क्याम्पसले आफ्नो श्रोत, दाता परिवार र स्थानीय तहको सहयोगमा उत्कृष्ट शैक्षिक उपलब्धि हासिल गरिहेको छ ।’
०४४ सालमा तत्कालीन लहान नगर पञ्चायतले साढे १० बिघाभन्दा बढी जग्गा उपलब्ध गराएपछि थालिएको लहान क्याम्पसका लागि उद्योगी परिवारका दिवंगत परमेश्वर मुरारकाले आफ्ना बाबु ज्वालाप्रसाद र आमा स्योवाई मुरारकाको नाममा २२ कोठे भवन बनाइदिएका थिए । मानविकी संकायबाट पढाइ थालनी भएको क्याम्पसमा अहिले मावितर्फ कम्प्युटर विज्ञान, व्यवस्थापन, शिक्षा, मानविकी, विज्ञान, त्रिभुवन विश्वविद्यालयको सम्बन्धनमा स्नातकतर्फ बिएस्सी, बिबिएस, बिएड, इपिएम, बिटेक, बिए, स्नातकोत्तर तहको एमएडतर्फ अंग्रेजी, पाठ्यक्रम, स्वास्थ्य, व्यवस्थापनतर्फ एमबिएस र मानविकीतर्फ समाजशास्त्र र राजर्षि जनक विश्वविद्यालयको सम्बन्धनमा बिबिए र बिसिए पढाइ भइरहेको क्याम्पस प्रमुख चौधरीले बताए ।
