Skip This
लुम्बिनी प्रदेशका मुख्यमन्त्री चेतनारायण आचार्यले स्थानीय उत्पादनका सामग्रीको प्रवर्द्धनबाटै रोजगारी सिर्जना गर्न सकिने बताएका छन् । लमही नगरपालिका– ३ फल्कापुरमा नेपाल महिला हस्तकला कपडा उद्योगको बुधबार उद्घाटन गर्दै मुख्यमन्त्री आचार्यले बाहिरबाट आयातीत कपडाको सट्टा स्वदेशमै उत्पादन भएका कपडाहरूको प्रयोग गर्न सबैमा आह्वान गरेका हुन् ।
‘हामीले प्रयोग गर्ने अधिकांश कपडा स्वदेशमा बनेका होइनन् । म सबैलाई स्वदेशमा वा हाम्रै प्रदेशमा उत्पादन भएका सामग्री प्रयोग गर्न अनुरोध गर्न चाहन्छु,’ उनले भने, ‘बाहिरबाट आएका कपडालाई विस्थापित गर्दै स्वदेशमै उत्पादन भएका कपडा प्रयोग गरेर अगाडि बढ्न जरुरी छ ।’ लुम्बिनी प्रदेशमा मात्र होइन, देशका कुना–कुनामा यहाँ उत्पादन भएका कपडाको बजार विस्तार गर्नुपर्नेमा मुख्यमन्त्री आचार्यले जोड दिए ।
