बुटवलले शिक्षा, स्वास्थ्य, सिप तथा रोजगारलाई प्राथमिकता दिने

बुटवल उपमहानगरपालिकाले आगामी आर्थिक वर्षमा शिक्षा, स्वास्थ्य र सिप तथा रोजगारलाई प्राथमिकता दिने भएको छ। बुटवल उपमहानगरपालिकाको मुखपत्र बुटवल दर्पणको विमोचन कार्यक्रममा बोल्दै उपमहानगरप्रमुख खेलराज पाण्डेयले आगामी आर्थिक वर्षको नीति तथा कार्यक्रम र बजेटमा शिक्षा, स्वास्थ्य, सीप तथा रोजगारलाई प्राथमिकता दिने बताए।

उनले बुटवललाई शिक्षा, स्वास्थ्यमा अब्बल सहर बनाउँदै सिप तथा रोजगारका क्षेत्रमा पर्याप्त अवसर सिर्जना हुने गरी बजेट निर्माण गर्ने बताए। उनले बुटवललाई समृद्ध बनाउनका लागि बुटवल उपमहानगरपालिकाको एक्लो प्रयासले मात्रै सम्भव नहुने बताए। ‘स्थानीय राजनीतिक दल, सामाजिक संघसंस्था र सबै नगरवासीको उत्तिकै दायित्व रहन्छ,’ उनले भने, ‘यसमा नगरले सधैँ सबैको साथ र सहयोगको अपेक्षा गर्दै आएको छ।’

उनले तीन वर्षको अवधिमा भए–गरेका कामहरूको समीक्षा गर्दै बाँकी अवधिमा बुटवलको हित र पक्षमा काम गर्ने बताए। ‘हामीले कार्यभार सम्हालेको तीन वर्षको समीक्षा गर्दै बाँकी अवधिमा पनि बुटवललाई सबल र समृद्ध बनाउने गरी काम गर्नेछौँ,’ उनले भने, ‘यसमा सबैको साथको जरुरी छ ।’ प्रमुख पाण्डेयले विकास निर्माणका काममा संघ, प्रदेश र स्थानीय सरकारको सहकार्य र समन्वय जरुरी रहने भएकाले बुटवलको विकासमा सबैको उत्तिकै भूमिका रहने बताए। ‘नभएका काममा मात्रै बुटवलले गरेन भन्ने, तर जे–जति काम भएका छन् त्यसमा बुटवलको भूमिकै छैन जसरी विचार निर्माण गर्न भएन,’ उनले भने, ‘बुटवलले आफ्नोतर्फबाट गर्ने काममा सधैँ प्राथमिकता दिएको छ।’

तीन वर्षको कार्यकालका मुख्य–मुख्य उपलब्धिहरूलाई समेटेर बुटवल दर्पण प्रकाशन गरेको बताउँदै उनले चालू आर्थिक वर्षमा जारी रहेका कामहरूको विवरण असार मसान्तपछि मात्रै थप गरेर प्रकाशन गर्ने बताए। उनले बुटवललाई समृद्ध बनाउनका लागि सबै पक्ष र क्षेत्रको साथ र सहयोगको अपेक्षा र सुझावको खाँचो रहेको बताए।

कार्यक्रममा बोल्दै उपप्रमुख सावित्रादेवी अर्यालले बुटवललाई समृद्ध र सबल सहरका रूपमा स्थापित गर्नका लागि सबैको भूमिका आवश्यक पर्ने बताइन्। उनले बुटवललाई शिक्षा, स्वास्थ्य र सिप तथा रोजगारका क्षेत्रमा अब्बल बनाउनका लागि आवश्यक कामहरू भइरहेको र त्यसलाई अझ परिष्कृत गर्दै लैजाने बताइन्।