किएभमा भएको रुसी आक्रमणमा चारजनाको मृत्यु

रुसले युक्रेनको राजधानी किएभमा गरेको आक्रमणमा कम्तीमा चारजनाको मृत्यु भएको युक्रेनी अधिकारीहरूले शुक्रबार बताएका छन् । आक्रमणमा २० जना घाइते भएको जनाइएको छ । रुसले रातभर युक्रेनमा ड्रोन आक्रमण गरेको अधिकारीहरूले बताएका छन् ।

‘पटक–पटक रुसी युएभी र ब्यालेस्टिक मिसाइलको सिकार भएका किएभका उद्धारकर्ताहरूले सहरबाट प्रतिक्रिया दिइरहेका छन्,’ युक्रेनको आपतकालीन सेवाले टेलिग्राममार्फत दिएको जानकारीमा उल्लेख छ ।

किएभका नगर प्रमुख भिटाली क्लिट्स्कोले राजधानीमा भएको घटनाको पुष्टि गर्दै घाइतेमध्ये १६ जनालाई अस्पतालमा भर्ना गरिएको बताएका छन् ।

आक्रमणका कारण आवासीय भवन, पूर्वाधारलगायत संरचना क्षतिग्रस्त भएका छन् भने ठाउँठाउँमा आगलागी भएको छ ।

युक्रेनको राष्ट्रिय रेलवे सञ्चालकले रेलसेवा ढिलाइ हुने चेतावनी दिँदै आक्रमणले किएभ क्षेत्रमा रेलमार्गहरू क्षतिग्रस्त भएको उल्लेख गरेको छ ।

पश्चिमी युक्रेनको लुत्स्क सहर र टेर्नोपिल क्षेत्रमा पनि थुप्रै आक्रमण भएका छन् । ‘आज, शत्रुले हाम्रो क्षेत्रमा अहिलेसम्मको सबैभन्दा ठुलो हवाई आक्रमण गरेको छ । त्यहाँ धेरै आक्रमण भएका छन्,’ टेर्नोपिलका क्षेत्रीय सैन्य प्रशासन प्रमुख व्याचेस्लाव नेगोडाले भने ।

आगलागी नियन्त्रण तथा क्षति र अन्य परिणामहरूको मूल्यांकन गर्न थालेको र लुत्स्कमा भएको आक्रमणमा पाँचजना घाइते भएको उनले बताएका छन् ।

धेरै निजी घरहरू र शैक्षिक संस्थाहरू क्षतिग्रस्त भएको सहरका नगरप्रमुख इगोर पोलिस्चुकले टेलिग्राममार्फत जानकारी गराएका छन् ।

पश्चिमी सहर खमेल्नेत्स्कीमा भवन र सवारीसाधन पनि क्षतिग्रस्त भएको पनि उक्त क्षेत्रका गभर्नरले बताए । रुसी राष्ट्रपति भ्लादिमिर पुटिनले रुसमा किएभले हालै गरेको ड्रोन आक्रमणको बदला लिने वाचा गरेका छन् ।

यसैबिच, पश्चिमी तुला क्षेत्रमा रुसमा भएको युक्रेनी हमलामा तीनजना घाइते भएका छन् । रुसी हवाई रक्षा बलले मस्कोलाई लक्षित गरेको ड्रोनलाई गोली हानेर खसालेको किएभका नगरप्रमुखले बताएका छन् ।रासस