भोलिदेखि पोखरामा युवा संघको १०औँ राष्ट्रिय महाधिवेशन

एमालेको भातृ संगठन युवा संघ नेपालको १०औँ राष्ट्रिय महाधिवेशन भोलिदेखि पोखरामा सुरु हुँदै छ। आइतबारसम्म चल्ने महाधिवेशनको उद्घाटन एमाले अध्यक्षसमेत रहेका प्रधानमन्त्री केपी शर्मा ओलीले गर्ने तय भएको छ। 

पोखराको अम्मरसिंह चौरमा हुने उद्घाटन शत्रमा पार्टीका महासचिव शंकर पोखरेल, उपमहासचिवसमेत रहेका नेपाल सरकारका सञ्चार तथा सूचना प्रविधिमन्त्री पृथ्वीसुब्बा गुरुङ, जनसंगठन समन्वय संयन्त्र प्रमुखसमेत रहेका एमाले स्थायी कमिटी सदस्य भानुभक्त ढकाललगायत नेताको सहभागिता रहने संघ कास्कीका सचिव हिमाल गुरुङले जानकारी दिए।

तीन दिन चल्ने महाधिवेशनमा सहभागी हुन देशभरबाट दुई हजार प्रतिनिधि पोखरामा जम्मा हुँदै छन्। अधिवेशनले अध्यक्ष, उपाध्यक्ष दुई, महासचिव, उपमहासचिव, सचिव चारजना, नौजना पदाधिकारीसँगै एक सय ५१ सदस्यीय नयाँ कमिटी चयन गर्नेछ। 

संघका अध्यक्ष क्षितिज थेबेका अनुसार महाधिवेशन कार्यनीति र कार्यभार निर्माण गर्ने थलोको रूपमा स्थापित हुनेछ। 

अध्यक्षमा पाँचजनाको दाबी

संघको नेतृत्वको लागि पाँचजनाले दाबी गरेका छन्। पाँचजनाले दाबी गरे पनि पार्टी अध्यक्ष ओलीले सर्वसम्मत नेतृत्व चयन गर्न निर्देशन दिएको स्रोतको भनाइ छ। हालका अध्यक्ष थेबेसँगै उपाध्यक्षहरू प्रकाश गौतम, कृष्णहरि केसी, महाराज गुरुङ र महासचिव सुमन पुरीले अध्यक्षमा दाबी जनाएका  छन्। अध्यक्षसँगै अन्य पदाधिकारी र सदस्यहरूमा आकांक्षा राख्ने धेरै छन्, तर पार्टी नेतृत्वले नै सर्वसम्मत गर्न भनेपछि आफूले चाहेको पदमा उम्मेदवारी दिन नपाउने भएपछि आकांक्षीहरू निराश बन्न पुगेका छन्।