विसं ०८१ : ६२ नेपाली चलचित्र प्रदर्शन

नेपाली चलचित्र क्षेत्रका लागि वर्ष–२०८१, समग्रमा सुखद रह्यो । यो वर्ष प्रदर्शन भएको चलचित्र ‘पूर्णबहादुरको सारंगी’ ले घरेलु बजारमा रु. ४६ करोड ८० लाख (ग्रस) व्यापार गरेको तथ्यांक सञ्चार तथा सूचना प्रविधि मन्त्रालयअन्तर्गतको ‘सेन्ट्रल म्यानेज्मेन्ट टिकट सिस्टम (बक्स अफिस)’मा छ। यही कारण विसं २०८१ लाई नेपाली चलचित्रको इतिहासमा स्मरणयोग्य बनिसकेको छ। 

अन्तिम चलचित्रका रूपमा ‘पीताम्बर’ र ‘कर्मा’ गत चैत २९ गतेदेखि प्रदर्शन भएको सहित यो वर्ष ‘बक्स अफिस’ को तथ्यांकअनुसार ६२ नेपाली चलचित्र प्रदर्शन भएका छन्। यसरी स्वदेशी ६२ चलचित्र प्रदर्शन हुँदा विदेशी ८४ भएका छन्। यो वर्ष नेपाली चलचित्रका दर्शक उलेख्य रूपमा बढेको चलचित्र वितरक तथा प्रदर्शकहरूको छाता संस्था नेपाल चलचित्र संघका अध्यक्ष नरेन्द्र महर्जनले बताए। 

उनले भने, 'यो वर्ष दसैँ र तिहारमा प्रदर्शन भएका चलचित्रले दर्शकलाई चलचित्र भवनमा तान्न सफल भए। स–परिवार नै चलचित्र हेर्न आएको पाइयो। पारिवारिक चलचित्रले दर्शक बढाउन महत्त्वपूर्ण भूमिका खेलेकोजस्तो लागेको छ। यस वर्षको सफलताले आउँदो वर्ष चलचित्र निर्माणमा वृद्धि हुनेछ।'

उनले चलचित्र भवन सञ्चालक (प्रदर्शक)ले यस वर्ष १८ घण्टाभन्दा बढी काम गरेको बताए। वर्षको अन्तिममा प्रदर्शन भएका चलचित्रले राम्रो सुरुवात गरेका छन्। 

यस्तै, आउँदो वर्ष विसं २०८२ को सुरुवाती दिन वैशाख १ मा समग्र चलचित्रको व्यापार राम्रो हुने निर्देशक पुर्नेन्दु झाको बुझाइ छ। उनले आउँदो वर्ष नेपाली चलचित्रका लागि महत्त्वपूर्ण भएको बताए। 

'यो वर्ष प्राप्त सफलताले नयाँ र पुराना दुवै चलचित्रकर्मीको सक्रियता निर्माणमा बढेको छ, आउँदो वर्ष ती चलचित्रकर्मीले चलचित्र लिएर दर्शकसम्म आउनुहुनेछ। नयाँ दर्शकलाई आकर्षित गर्न सके आउँदो वर्ष नेपाली चलचित्रले नयाँ सुरुवात गर्नेछ। यो वर्षको व्यावसायिक सफलतालाई नाघ्नु नै चुनौती देखिएको छ,' निर्देशक झाले भने। 

उनी आउँदो वर्ष विसं २०८२ ले यस वर्ष बनेको बजारको आकार बढाउन सक्नुपर्नेमा जोड दिनुभयो। आउँदो वर्ष विसं २०८२ मा ८० हाराहारीमा चलचित्र प्रदर्शन हुने अनुमान चलचित्रकर्मीले गरेका छन्। 

‘बक्स अफिस’मा रहेको तथ्यांकअनुसार ५९ नेपाली चलचित्रले कुल कमाइ रु. एक अर्ब ८० करोड गरेको छ। तथ्यांक बाँकी रहेका तीन चलचित्र ‘वसन्त’, ‘पीताम्बर’ र ‘कर्मा’सहित प्रदर्शनरत अन्य नेपाली चलचित्रको व्यापार (ग्रस) पाँच करोड भएको अनुमान चलचित्रकर्मीको छ। यसकारण नेपाली बजारको आकार रु. एक अर्ब ८५ करोडको हाराहारीमा पुगेको अनुमान गरिएको छ।