‘प्रधानमन्त्रीज्यू सरकारले नै मुद्दा चलाएका व्यवसायीसँग अर्बौँबराबरको सम्पत्ति लिन मिल्छ ?’

सामाजिक अभियन्ता मिलन पाण्डेले प्रधानमन्त्री केपी ओलीलाई सरकारले नै मुद्दा चलाएका व्यवसायीसँग अर्बौँबराबरको सम्पत्ति लिन मिल्छ भनेर प्रश्न गरेका छन् । बुधबार सामाजिक सञ्जालमार्फत उनले यस्तो प्रश्न गरेका हुन् । उनले यो प्रश्न मीनबहादुरलाई नभएर प्रधानमन्त्रीलाई सोधेको स्पष्ट पारेका छन् । उनले स्रोत जायज छ ? भनेर प्रश्न गरे । 

उनले भनेका छन् ‘ओलीज्यू, नेपालको कानुनले २५ हजार रुपैयाँभन्दा बढी आर्थिक सहयोग लिँदा स्रोत खुलाउन लगाएर मात्र लिनुपर्ने व्यवस्था गरेको छ । त्यो सम्पत्तिको स्रोत के हो ? स्रोत जायज छ ?  ओलीज्यू, नेपालको कानुनअनुसार आर्थिक सहायता प्राप्त गर्दा दलबाट कुनै आर्थिक वा व्यक्तिगत फाइदा लिने सर्त गरी प्रदान गर्न र त्यस्तो फाइदा लिने गरी दलले सहयोग प्राप्त गर्नुहुँदैन भनेको छ। व्यापारीले बाढीपीडितलाई दान दिन छाडेर तपाईंलाई जग्गा पुन्य कमाउन दिएको पक्कै होइन। ‘त्यो सर्त के हो ? तपाईंले के दिन्छु भनेर त्यो जग्गा लिनुभयो,’ उनले भने । 

‘ओलीज्यू एमालेको पार्टी कार्यालय केही वर्षअघि मात्र बनेको थियो। पहिला बल्खुमा थियो, अनि च्यासल सर्‍यो अनि फेरि नयाँ ? यो एमालेको पार्टी कार्यालय कसले बनाउँदै छ ? कतै यहीँ पनि भ्रष्टाचार त भएको छैन ? यो नै धन्दा त बनेको छैन ? एमालेका साथीहरूले खोज्नुहोला।’

उनले अन्तिम प्रश्न भन्दै सोधे, ‘हजारौँ नागरिक घरबारविहीन हुँदा, प्रधानमन्त्रीले पार्टी अफिस बनाउने कि त्यो जग्गा, घरबारविहीनलाई उपलब्ध गराउन मद्दत गर्ने ? प्रधानमन्त्री राहत कोषमा कति उठ्यो ? कानुनी, राजनीतिक र नैतिक प्रश्न प्रधानमन्त्री ओलीलाई हो। मीनबहादुर गुरुङ त व्यापारी हुन्, उनले ‘राम्रो घाटा नहुने ठाउँमा लगानी गरे।’