नियम उल्लंघन गर्नेले सक्कल लाइसेन्स नै बुझाउनुपर्ने

काठमाडौं उपत्यका ट्राफिक प्रहरी कार्यालयले नागरिक एपमा सवारीचालक अनुमतिपत्र (लाइसेन्स) लिंक रहे पनि नियम उल्लंघनपछि कारबाहीका क्रममा सक्कल लाइसेन्स नै बुझाउनुपर्ने स्पष्ट पारेको छ।

कार्यालयका प्रवक्ता तथा  प्रहरी वरिष्ठ उपरीक्षक राजेन्द्रप्रसाद भट्टले कुनै चालकले नागरिक एपमा लिंक रहेको सवारीचालक अनुमतिपत्र देखाउँदा पहिचान मात्रै हुने भएकाले नियम उल्लंघन गर्नेलाई कारबाहीका लागि सक्कल लाइसेन्स नै चाहिने बताएका हुन्। 

नागरिक एपमा जोडिएपछि अब चालकले लाइसेन्स बोक्नु नपर्ने सन्देश जाने गरी समाचार सार्वजनिक भएपछि यस विषयमा कार्यालयले सूचना जारी गरी  स्पष्ट पारेको उनले उल्लेख गरे। 

कार्यालयले जारी गरेको सूचनामा भनिएको छ, ‘हाललाई कुनै चालकले नागरिक एपमा लिंक रहेको सवारीचालक अनुमतिपत्र देखाउँदा उक्त चालक लाइसेन्स प्राप्त गरेको व्यक्ति हो वा होइन भन्ने कुराको जानकारीका लागि मात्र मान्य हुन्छ, तर ट्राफिक नियम उल्लंघन र कारबाही प्रक्रियाको क्रममा भौतिक रूपमा सक्कलै लाइसेन्स आवश्यक पर्ने व्यहोरा जानकारी गराइन्छ।’ 

ट्राफिक नियम उल्लंघन नगरेको अवस्थामा मात्रै नागरिक एपमा जोडिएको लाइसेन्सले काम गर्ने जनाइएको छ। नियम उल्लंघनपछि भने यसअघि झैँ सामान्य अवस्थामै जसरी सक्कल लाइसेन्सको आधारमा कारबाही प्रक्रिया अघि बढ्ने जनाइएको छ।