- वि.सं २o८o असोज ११ बिहीबार
मकवानपुरको हेटौँडामा चिर्पट प्रहारबाट तीनजना व्यक्ति गम्भीर घाइते भएका छन्। हेटौँडा उपमहानगरपालिका– ३ भुलन टोलका ५० वर्षीय बद्रीनाथ मैनालीले चिर्पट प्रहार गर्दा तीनजना घाइते भएका हुन्।
घाइते हुनेमा ७३ वर्षीय रामजी मैनाली, ६५ वर्षीया माया मैनाली र ४० वर्षीय केदार मैनाली रहेका बागमती प्रदेश प्रहरी कार्यालय हेटौँडाले जनाएको छ। घाइतेहरू चिर्पट प्रहार गर्ने बद्री मैनालीका बाबु, आमा र भाइ हुन्।
प्रहरीका अनुसार चिर्पट प्रहारबाट बाबु रामजीको दायाँ हात र कुहिनामा चोट लागेको छ भने आमा मायाको टाउको तथा भाइ केदारको हातमा चोट लागेको छ।
घाइतेमध्ये मायालाई थप उपचारका लागि चितवनस्थित पुरानो मेडिकल कलेज रिफर गरिएको छ भने रामजी र केदारको हेटौँडा अस्पतालमा उपचार भइरहेको प्रदेश प्रहरी कार्यालय हेटौँडाले जनाएको छ।
कुटपिट गर्ने बद्रीनाथलाई प्रहरीले नियन्त्रणमा लिएर अनुसन्धान थालेको छ।
2022-09-29-12-22-58.jpeg)
