भीषण पहिरोले मुग्लिन–नारायणगढ सडक सोमबार रातिदेखि अवरुद्ध

निरन्तर ढुंगा खस्न थालेपछि पहिरो पन्छाउन सकस

संघीय राजधानी काठमाडौं प्रवेश गर्ने मुख्य राजमार्ग मुग्लिन–नारायणगढ सडक भीषण पहिरोका कारण अवरुद्ध भएको छ । चितवनको इच्छाकामना गाउँपालिका ६, नाम्सी पुलनजिकै सोमबार राति सवा ८ बजे सुक्खा पहिरो खसेपछि सडक अवरुद्ध भएको हो । राति अबेरसम्म ढुंगा झर्दा सडक डिभिजन भरतपुरले पहिरो पन्छाउन सकेको छैन ।

सडक डिभिजनका इन्जिनियर सागर कार्की क्षेत्रीले भने, ‘एउटा–एउटा एक्स्काभेटर र जेसिभीसँगै दुईवटा रोडर पहिरो पन्छाउन लगिएको छ । तर, ढुंगा खसिरहेकाले पन्छाउन सकिएको छैन ।’ 

सडक नै छोप्ने गरी नाम्सी पुलअगाडि पहिरो खसे पनि राति भएकाले माथिबाट कति ठूलो पहिरो खसेको हो यकिन हुन सकेको छैन । गत वर्ष यही ठाउँमा दिउँसो ठूलो पहिरो खस्दा ६ घन्टा सडक अवरुद्ध भएको थियो । ‘राति पहिरो पन्छाउन जोखीम पनि हुन्छ ।तर, काम गर्ने अवस्था हुनासाथ पहिरो पन्छाउन सुरु हुनेछ,’ उनले भने । तर, कति समयमा पहिरो पन्छाउन सकिएला भनेर सडक डिभिजनले नै अनुमान गर्न सकेको छैन ।  

जिल्ला प्रहरी कार्यलय चितवनका प्रमुख एसपी रामेश्वर कार्कीका अनुसार मंगलबार दिउँसो मात्र पहिरो हटाउन असम्भव छ । ‘एकदमै ठुलो पहिरो छ,  ढुंगा खस्ने क्रम रोकिएको छैन । ज्यान जोखीममा राखेर रातिमा कसरी काम गर्ने ?मंगलबार पनि दिनभर नै लाग्छ होला । ’ 

सडकमा पहिरो खसेपछि काठमाडौंबाट छुटेका र काठमाडौंका लागि आउँदै गरेका सवारीसाधान बीचबाटोमै अलपत्र परेका छन् । सवारीसाधनलगायत यात्रुलाई सुरक्षित स्थानमा बस्न आग्रह गरिएको एसपी कार्कीले बताए । यो सडकमा यात्रुवाहक र मालवाहक गरेर दैनिक ११ हजार सवारीसाधन गुडछन् ।