पर्यटन बोर्डले सवा अर्बको बजेट ल्याउने 

कार्यान्वयनयोग्य बजेट ल्याउन निजी क्षेत्रको सुझाव

देशमा पर्यटन प्रवर्द्धनको मुख्य जिम्मेवारी पाएको नेपाल पर्यटन बोर्डले आगामी आर्थिक वर्षका लागि करिब सवा अर्ब रुपैयाँको बजेट ल्याउने भएको छ । बोर्डको बजेट समितिकी संयोजक मिलन देवकोटाले सवा अर्बभित्रको बजेट ल्याउने तयारी भइरहेको जानकारी दिएकी हुन् ।  

पर्यटन बोर्डले विगत वर्षहरूको बजेटको समीक्षासहित नयाँ बजेटबारे निजी क्षेत्रको राय–सुझाव माग गरेको थियो । पर्यटन क्षेत्रसँग सम्बन्धित विभिन्न संघ–संस्थाका प्रतिनिधिहरूले कार्यान्वयन हुने खालको बजेट ल्याउन सुझाव दिएका छन् । अन्तर्राष्ट्रिय पर्यटन प्रवर्द्धनका कार्यक्रम गर्दा परम्परागतभन्दा पनि नयाँ ढंगले काम गर्न बोर्डलाई सुझाव दिइएको छ । बोर्डले आयोजना गर्ने आन्तरिक तथा अन्तर्राष्ट्रिय कार्यक्रमहरूमा निजी क्षेत्रको सहभागितालाई बढीभन्दा बढी गराउन पनि निजी क्षेत्रको सुझाव छ ।

बजेट संयोजक देवकोटाले आगामी वर्षको ८० प्रतिशत बजेट अन्तर्राष्ट्रिय बजारमा पर्यटन प्रवर्द्धन र बाँकी रकम आन्तरिक पर्यटन प्रवर्द्धन तथा पूर्वाधार निर्माणमा खर्चिने योजना रहेको बताइन् । उनले भनिन्, ‘बोर्डको मुख्य काम पर्यटन प्रवर्द्धन गर्ने रहेको परिप्रेक्ष्यमा निजी क्षेत्रबाट प्राप्त सुझावले बजेट कार्यान्वयनमा सहजता ल्याउने विश्वास गरेका छौँ ।’

बोर्डले निजी क्षेत्रको सुझावलाई समेटेर बजेट तर्जुमा गर्ने र बजेट निजी क्षेत्रमैत्री हुने बोर्डका उपाध्यक्ष चन्द्र रिजालले बताए । उनले छलफलका क्रममा निजी क्षेत्रबाट रचनात्मक सुझाव आएको उल्लेख गर्दै ती सुझावलाई समेटेर बजेटलाई अन्तिम रूप दिइने बताए । बोर्डका सदस्य मदन आचार्यले निजी क्षेत्रसँग गरिएको छलफलले बजेट निर्माण तथा कार्यान्वयनमा सहजता ल्याउने बताए । 

छलफलमा होटेल संघ नेपाल (हान), प्यासिफिक एसोसिएसन अफ ट्राभल एजेन्ट (पाटा), ट्रेकिङ ऐजेन्सिज एसोसिएसन अफ नेपाल (टान), नेपाल एसोसिएसन अफ टुर एन्ड ट्राभल एजेन्सिज (नाटा), नेपाल ¥याफ्टिङ एजेन्सिज (नारा), नेपाल माउन्टेनियरिङ एसोसिएसन (एनएमए)लगायत संस्थाहरूका प्रतिनिधिहरूले बोर्डको आगामी बजेटका सम्बन्धमा आफ्ना सुझाव दिएका थिए ।