- वि.सं Invalid date format
शुक्रबारदेखि भृकुटीमण्डपमा ‘इलेक्ट्रिक एन्ड इलेक्ट्रोनिक्स’ अन्तर्राष्ट्रिय प्रदर्शनी आयोजना हुँदै छ । मिडिया स्पेस सोलुसन्स, फ्युचरेक्स ट्रेड फेर एन्ड इभेन्ट्स तथा एक्जिबिसन एन्ड ट्रेड सर्भिसेस इन्डिया प्रालिको संयुक्त आयोजनामा प्रदर्शनी हुन लागेको हो । विद्युतीय उपकरणलाई प्रवद्र्धन तथा प्रोत्साहन, विद्युत् तथा गुणस्तरीय विद्युतीय सामग्रीको व्यवसाय विकासका साथै आन्तरिक र अन्तर्राष्ट्रिय व्यापारको सहजीकरण एवं प्रवद्र्धन गर्ने उद्देश्यसहित प्रदर्शनी आयोजना गर्न लागिएको हो । प्रदर्शनी १३ देखि १५ भदौसम्म चल्नेछ ।
नेपालीको महान् पर्व बडादसैँको सेरोफेरोमा आयोजना हुन लागेको यस प्रदर्शनीमा उच्च गुणस्तरका अत्याधुनिक एवं नवीनतम प्रविधिका ट्रान्समिसन तथा डिस्ट्रिब्युसन सामग्री, ऊर्जा आपूर्ति तथा कन्ट्रोल डिभाइस, हाउस वायरिङका सामग्री, तार, केबुल एवं कन्डक्टर प्रदर्शन गरिनेछ । त्यस्तै, अत्याधुनिक प्रकारका स्विचहरू, एलइडी लाइटिङ, इलेक्ट्रोनिक्स उपकरण, घरेलु विद्युतीय उपकरणहरू, चार्जिङ स्टेसन, ब्याट्री, कार्यालयमा प्रयोग हुने विद्युतीय प्रविधि तथा अन्य विद्युतीय सामग्रीका कम्पनीहरूको सहभागिता रहने आयोजकले जनाएको छ ।
नेपाल कन्जुमर इलेक्ट्रोनिक्स एन्ड होम अप्लायनसेस अन्तर्राष्ट्रिय प्रदर्शनीअन्तर्गत दसैँको अवसर पारेर ग्राहकले विभिन्न कम्पनीका विद्युतीय सामग्री एकै ठाउँमा हेर्न तथा खरिद गर्न पाउनेछन् । विभिन्न विद्युतीय माध्यमको प्रयोगमा वृद्धि गरी मुलुकमा बढ्दो जलविद्युत्को उत्पादनको खपतमा वृद्धि गर्दै देशलाई आर्थिक रूपमा सबलीकरण गर्ने एवं ऊर्जा तथा विद्युतीय व्यवसायीको समग्र विकास तथा व्यापार प्रवद्र्धनमा टेवा पुर्याउने उद्देश्यका साथ प्रदर्शनीको आयोजना हुँदै छ ।
राष्ट्रिय एवं अन्तर्राष्ट्रिय इलेक्ट्रिक, इलेक्ट्रोनिक्स, सञ्चार एवं सूचना प्रविधि तथा विद्युतीय एवं वैकल्पिक ऊर्जा उद्यमीलाई एकै स्थानमा जमघट गराई व्यावसायिक प्रवद्र्धन गर्नुका साथै यी उद्योगमा भएका नवीनतम उपलब्धिबारे सूचना आदानप्रदान गर्ने तथा उपभोक्ता वर्गमा ऊर्जाको व्यवस्थित खपतको महत्वबारे सन्देश फैलाउन सहयोग पुर्याउने लक्ष्य यस संस्करणको रहेको छ ।
