- वि.सं Invalid date format
कर्णाली प्रदेशको हुम्लामा बन्ने दुई जलविद्युत् परियोजनाको क्षमता बढाइएको छ । प्रवर्द्धक कम्पनीहरूले हुम्लामा बन्ने चुवाखोला र अपर चुवा लुरुप्या अर्धजलाशययुक्त जलविद्युत् परियोजनाको क्षमता बढाएर निर्माण गर्न लागेका हुन् । सर्वेक्षणका क्रममा परियोजनाको क्षमता बढाउन सकिने देखिएपछि प्रवर्द्धक कम्पनीहरू यस्तो निर्णयमा पुगेका हुन् ।
पोर्टफोलियो इनर्जी प्रालिले एक सय तीन मेगावाट क्षमतामा बनाउने गरी अपर चुवा लुरुप्या खोला जलविद्युत् आयोजनाको सर्वेक्षण अनुमति लिएको थियो । सर्वेक्षणपश्चात् परियोजनालाई ११०.२ मेगावाट क्षमतामा बनाउन सकिने देखिएको छ । हाल यस परियोजनाले विद्युत् उत्पादन अनुमतिपत्रका लागि विद्युत् विकास विभागमा आवेदन दिएको छ । यसमा मलेसियन कम्पनी ओएचपी नेपाल (ओएचपी नेपाल इनकर्पोरेटेड) पनि आबद्ध छ ।
यस्तै, चुवाखोला जलविद्युत् परियोजनाको क्षमता ७० मेगावाटबाट बढाएर ९८.१७ मेगावाट पुर्याइएको छ । यसको प्रवर्द्धक कम्पनी बिजबेल इनर्जी प्रालि रहेको छ । पहिला यस आयोजनालाई ७० मेगावाट क्षमतामा बनाउने गरी सर्वेक्षण अनुमति लिइएको थियो । सर्वेक्षणका क्रममा परियोजनाको क्षमता बढ्ने देखिएको हो । यो परियोजनाले पनि उत्पादन अनुमतिपत्रका लागि विद्युत् विकास विभागमा आवेदन दिएको छ ।
यी दुवै आयोजनाको वातावरणीय प्रभाव मूल्यांकन (इआइए) प्रतिवेदन वन तथा वातावरण मन्त्रालयले सार्वजनिक गरिसकेको छ । सर्वेक्षण अनुमतिपत्रको पाँच वर्षको म्याद २८ मंसिर ०८१ मा सकिसकेको हुनाले आयोजनाको विद्युत् उत्पादन अनुमतिपत्रको प्रक्रियामा रहेको छ ।
११०.२ मेगावाटको अपर चुवा खोला आयोजनाको अनुमानित निर्माण अवधि चार वर्ष रहेको छ भने निर्माण लागत २२ अर्ब ८५ करोड आठ लाख रुपैयाँ अनुमान गरिएको छ । ९८.१७ मेगावाटको चुवाखोला आयोजना बनाउनका लागि १७ अर्ब ६९ करोड रुपैयाँको लागत अनुमान गरिएको छ ।
