- वि.सं Invalid date format
जबर्जस्ती करणीको मुद्दामा सफाइ पाएको भोलिपल्टै आरोपीले जिल्ला प्रहरी कार्यालय सप्तरीपरिसरस्थित डिएसपीनिवासमा ‘सेलेब्रेसन’ गरेको विषयमा छानबिनका लागि गठित प्रदेश प्रहरीको टोलीले पनि अनुसन्धान थालेको छ ।
समाचार आएपछि मधेश प्रदेश प्रहरी कार्यालय जनकपुरले बुधबार प्रहरी उपरीक्षक (एसपी) नारायण रञ्जितकारको नेतृत्वमा तीन सदस्यीय छानबिन टोली गठन गरेको थियो ।
मधेश प्रदेश प्रहरी कार्यालयले बनाएको टोलीले बिहीबार जिल्ला प्रहरी कार्यालय सप्तरी पुगेर घटनाको अनुसन्धान थालेको छ। प्रहरी उपरीक्षक नारायण रञ्जितकारको संयोजकत्वमा आएको तीनसदस्यीय टोलीले घटनामा संलग्न सबैसँग बयान लिन सुरु गरेको छ। ‘घटनामा संलग्न सबैसँग बयान लिइन्छ, बलात्कार मुद्दाको मिसिल पनि अध्ययन गरिन्छ,’ एसपी रञ्जितकारले भने।
बलात्कार मुद्दामा जिल्ला अदालत सप्तरीबाट गत ४ जेठमा सफाइ पाएका राजविराज नगरपालिका– ६ का आकाश आदर्शले भोलिपल्टै मुद्दाको अनुसन्धान अधिकृत रहेका प्रहरी निरीक्षकको ‘बर्थ डे सेलेब्रेसन’ गरेका थिए।
यो मुद्दामा तत्कालीन अनुसन्धान अधिकृत रहेका जिल्ला प्रहरी कार्यालयका प्रहरी निरीक्षक मनीष श्रेष्ठको जन्मदिन सेलेब्रेसन भन्दै पार्टी आयोजना गरिएको थियो। जसमा डिएसपी बस्नेत, प्रहरी निरीक्षक श्रेष्ठ, अर्का प्रहरी निरीक्षक उदयकुमार राई तथा एक दिनअघि सफाइ पाएका आकाश आदर्शसहित सहभागी थिए।
आदर्शले आफैँले सञ्चालन गरेको राजविराजको तन्दुरी रेस्टुरेन्टमा काम गर्ने एक महिलामाथि जबर्जस्ती करणी गरी भिडियो बनाई सार्वजनिक गरिदिन्छु भन्दै धम्क्याएको भन्दै ०८१ असोजमा जिल्ला प्रहरी कार्यालय सप्तरीमा जाहेरी परेको थियो। सोही जाहेरीका आधारमा प्रहरीले आदर्शलाई राजविराजबाट नियन्त्रणमा लिएर प्रहरी निरीक्षक मनीष श्रेष्ठलाई अनुसन्धान अधिकृत तोक्दै अनुसन्धान सुरु गरेको थियो। इन्स्पेक्टर श्रेष्ठको यसअघि नै चितवनमा सरुवा भइसकेको छ।
