Skip This
भारतीय क्रिकेट बोर्ड (बिसिसिआई)ले लखनउ सुपर जायन्ट्सका कप्तान ऋषभ पन्तलाई स्लो ओभर रेटका कारण ४८ लाख रुपैयाँ जरिवाना गराएको छ । इन्डियन प्रिमियर लिग (आइपिएल)अन्तर्गत लिगको अन्तिम खेलमा लखनउले रोयल्स च्यालेन्जर्स बेंग्लोरविरुद्ध स्लो बलिङ गरेको थियो । प्रतिस्पर्धामा बेंग्लोरले लखनउमाथि ६ विकेटको जित निकाली दोस्रो स्थान रक्षा गर्यो । लखनउका विकेटकिपर तथा कप्तान ऋभषले खेल आफ्नो पक्षमा ल्याउन बारम्बार खेलाडीसँग वार्ता तथा फिल्डिङ सेटिङमा ढिलाइ गरेको बिसिसिआईले जनाएको छ । यसकारण खेल निर्धारित समयमा समाप्त भएन । बिसिसिआईले लखनउका कप्तान ऋषभलाई भारु ३० लाख रुपैयाँ जरिवाना गराएको हो ।
यस सिजन आइपिएलमा उनको यो तेस्रो गल्ती हो । यद्यपि, बिसिसिआईले खेल खेल्न प्रतिबन्ध लगाएको छैन । गत वर्षको आइपिएलमा मुम्बई इन्डियन्सका हार्दिक पान्ड्या यस्तै गल्ती गर्दा एक खेल प्रतिबन्धमा परेका थिए । आइपिएलमा यसपटक खेलाडीमाथिको कारबाही लचिलो बनाइएको छ । २०२५ को संशोधित नियमअनुसार खेलाडीलाई रकम मात्र जरिवाना गरिने उल्लेख छ ।
‘आइपिएलको पछिल्लो नियमअनुसार लखउनका कप्तान र खेलाडीलाई कारबाही गरिएको छ,’ आइपिएलले जारी गरेको विज्ञप्तिमा भनिएको छ । बेंग्लोरविरुद्धको खेलमा लखनउका कप्तानसँगै ११ खेलाडीलाई १८ लाख रुपैयाँ र खेलबाट आउने ५० प्रतिशत रकमसमेत कटौती गरिएको छ । ऋषभले बेंग्लोरसँगको प्रतिस्पर्धामा ६१ बलमा ११८ रनको योगदान दिएका थिए ।
बेंग्लोरको सामना गर्दै पन्जाब
आइपिएलको पहिलो क्वालिफायरमा बिहीबार पन्जाब किंग्स र बेंग्लोर भिड्दै छन् । लिग चरणको अन्तिम खेलसँगै आइपिएलको क्वालिफायर र एलिमिनेटर खेल्ने टोलीको टुंगो लागेको हो । पन्जाब शीर्ष र बेंग्लोर दोस्रो स्थानमा रहँदै पहिलो क्वालिफायर खेल्ने भएका हुन् । लिगको एलिमिनेटर खेलमा गुजरात टाइटन्स र मुम्बई इन्डियन्स भिड्नेछन् । क्वालिफायरको विजेता सिधै फाइनलमा पुग्नेछ । पराजित टोलीले एलिमिनेटर खेलको विजेतासँग फाइनलका प्रवेशका लागि खेल्ने अवसर पाउनेछ ।
कोहलीले पूरा गरे टी–२० मा नौ हजार रन
बेंग्लोरका पूर्वकप्तान विराट कोहलीले लखनउविरुद्धको खेलमा टी–२० फम्र्याटमा नौ हजार रन पूरा गरेका छन् । कोहलीले टी–२० मा एउटै टोलीबाट प्रतिस्पर्धा गरिरहेका छन् । आइपिएलको पहिलो संस्करणदेखि उनी बेंग्लोरमै आबद्ध छन् । लखनउविरुद्धको खेलमा २४ रन पूरा गरेपछि उनले टी–२० मा नौ हजार रन बनाएका हुन् । उनले सन् २००८ मा बेंग्लोरबाट आइपिएल करिअर सुरु गरेका हुन् । कोहली आइपिएलमा सर्वाधिक अर्धशतक बनाउने खेलाडीसमेत बनेका छन् ।
