सञ्चय कोषका योगदानकर्ताको खातामा पाँच अर्ब ३४ करोड मुनाफा

कर्मचारी सञ्चय कोषले गत आर्थिक वर्ष ०८०/८१ मा आर्जन गरेको कुल मुनाफाबाट सञ्चयकर्ता तथा योगदानकर्तालाई करिब पाँच अर्ब ३४ करोड रुपैयाँ मुनाफा वितरण गरेको छ । कोषका सञ्चयकर्ताको खातामा पाँच अर्ब २७ करोड र योगदानमा आधारित निवृत्तिभरण कोषका योगदानकर्ताको खातामा ६ करोड ४३ लाख रुपैयाँ मुनाफा जम्मा गरिएको हो ।

कर्मचारी सञ्चय कोष सञ्चालक समितिको १७ चैतमा बसेको बैठकले कोषको आव ०८०/८१ को वित्तीय विवरण स्वीकृत गर्दै सञ्चयकर्ता तथा योगदानकर्ताको व्यक्तिगत खातामा रहेको सुरु मौज्दात रकममा १.१ प्रतिशतका दरले हुने रकम मुनाफाका रूपमा वितरण गर्ने निर्णय गरेबमोजिम मुनाफा सञ्चयकर्ता तथा योगदानकर्ताको खातामा जम्मा गरिएको बताइएको छ ।

कोषले प्रत्येक आर्थिक वर्षमा आर्जन गरेको कुल मुनाफाकोे ९२ प्रतिशत रकम सञ्चयकर्ताका लागि मुनाफा र कल्याणकारी प्रयोजनका लागि छुट्याई वितरण गर्ने गरेको छ भने बाँकी रकम विभिन्न जगेडा कोषमा राख्ने गरेको छ । कोषले सञ्चयकर्ता तथा योगदानकर्तालाई चालू आवमा सञ्चित रकममा ५.५ प्रतिशतका दरले ब्याज प्रदान गरेको छ । सञ्चयकर्ता तथा योगदानकर्ताले कोषबाट ६.६ प्रतिशत ब्याजमा सञ्चित रकमको ९० प्रतिशतसम्म विशेष सापटी पाउने गरेका छन् ।

कोषबाट सञ्चयकर्ता तथा योगदानकर्ताले पाउने ५.५ प्रतिशत ब्याजदरमा मुनाफा १.१ प्रतिशतसमेत जोड्दा जम्मा ६.६ प्रतिशत हुने र विशेष सापटीको ब्याजदर ६.६ प्रतिशत मात्र भएकाले सञ्चयकर्ता तथा योगदानकर्ताले प्राप्त गर्ने प्रतिफल र तिर्नुपर्ने ब्याज समान रहन गएको छ । अर्थतन्त्रमा देखिएको शिथिलतामा समेत सञ्चयकर्ता तथा योगदानकर्तालाई सञ्चित रकममा ब्याज र मुनाफा गरी वार्षिक ६.६ प्रतिशतका दरले प्रतिफल प्रदान गर्न सकेको कोषले जनाएको छ ।