- वि.सं २o८१ फाल्गुण ११ आइतबार
बिलबिजकभन्दा बढी सामान ढुवानी गरेको आशंकामा प्रहरीले पथलैयाबाट मालबाहक ट्रक नियन्त्रणमा लिएको छ। राजमार्गमा सवारी जाँचका क्रममा प्रहरीले ६२ लाख मूल्यबराबरको सामान बोकेको ट्रकलाई नियन्त्रणमा लिएको हो।
प्रहरी चौकी पथलैयाका प्रहरी वरिष्ठ नायब निरीक्षक रोशन अधिकारीको नेतृत्वमा रहेको प्रहरी टोलीले उक्त ट्रकलाई नियन्त्रणमा लिई राजस्व अनुसन्धान कार्यालयमा बुझाएको छ। वीरगन्जबाट चितवनतर्फ जाँदै गरेको ना ३ ख ५४५५ नम्बरको उक्त ट्रकले बिलबिजकभन्दा बढी सामान ढुवानी गरेको पाइएपछि नियन्त्रणमा लिएर अनुसन्धानका लागि बुझाइएको जिल्ला प्रहरी कार्यालय बाराका निमित्त सूचना अधिकारी बलराम श्रेष्ठले बताए।
उक्त ट्रकले मोबिल, अबिर, ब्याट्री, कपडा र खुद्रा सामान ढुवानी गरेको थियो। उक्त समानको मूल्य करिब ६२ लाख ३५ हजार रुपैयाँ रहेको प्रहरी निरीक्षक श्रेष्ठले जानकारी दिए।
