प्रदेश सरकारद्वारा उपत्यका ट्राफिक प्रहरीलाई स्मार्टफोन हस्तान्तरण

बागमती प्रदेश सरकारले उपत्यका ट्राफिक प्रहरीका लागि स्मार्टफोन हस्तान्तरण गरेको छ। डिजिटल सवारीचालक अनुमतिपत्र (लाइसेन्स) नियमनका लागि स्मार्टफोन हस्तान्तरण गरिएको हो।

प्रदेश सरकारको श्रम, रोजगार तथा यातायात मन्त्रालयको आयोजनामा शुक्रबार ललितपुरमा आयोजित कार्यक्रममा मुख्यमन्त्री बहादुरसिंह लामाले प्रहरी महानिरीक्षक वसन्तबहादुर कुँवरलाई स्मार्टफोन हस्तान्तरण गरे। मन्त्रालयका सचिव बलराम निरौलाले पाँच सयवटा स्मार्टफोन उपलब्ध गराएको जानकारी दिए। उपत्यका ट्राफिकका लागि थप फोन सेट क्रमशः उपलब्ध गराउँदै जाने पनि उनले बताए।

बागमती प्रदेशभित्र साढे आठ लाख लाइसेन्स वितरण नै हुन नसकेको उल्लेख गर्दै मन्त्री प्रेमभक्त महर्जनले लाइसेन्स डिजिटलाइजेसनले सेवाग्राहीलाई सुविधा पुगेको बताए। नागरिक एप्समा लाइसेन्स नम्बर राख्नासाथ डिजिटल लाइसेन्स उपलब्ध हुने र त्यसलाई आधिकारिक लाइसेन्स मानिने व्यवस्था गरिएको उनको भनाइ छ।

सो अवसरमा प्रहरी महानिरीक्षक कुँवरले प्राप्त स्मार्टफोनले लाइसेन्स जाँच र इ–चलानको सेवाप्रवाह प्रभावकारी पार्न मद्दत पुग्ने बताए। त्यसैगरी, मुख्यमन्त्री लामाले सवारीचालक अनुमतिपत्र बोकेर हिँड्नुपर्ने बाध्यता सरकारले हटाएको बताए।