Skip This
पाँचौँ संकरणको टाइगर कप राष्ट्रिय तथा अन्तर्राष्ट्रिय आमन्त्रित क्लब महिला तथा पुरुष भलिबल प्रतियोगिता ०८१ अन्तर्गत महिलातर्फ टिपटप न्यू डायमन्ड स्पाेर्टस् क्लब क्वालिफायरमा प्रवेश गर्दा पुरुषतर्फ नेपाली सेनाको त्रिभुवन आर्मी क्लब र पुलिसले क्वालिफायरमा स्थान बनाएका छन्।
टाइगर ग्रुप अफ पोखरा नेपालको आयोजना एवं एनसेलको मुख्य प्रायोजनामा जारी प्रतियोगिताअन्तर्गत बिहीबार सम्पन्न पुरुषतर्फ लिग चरणका खेलमा जित हात पार्दै गण्डकी प्रदेश भलिबल संघ र पाहुना टोली भारतको सुनील भलिबल क्लबले एलिमिनेटरमा स्थान सुरक्षित गरेका छन्।
प्रतियोगिताअन्तर्गत महिलातर्फ बिहीबार सम्पन्न एलिमिनेटरको खेलमा पुलिसलाई पराजित गर्दै डायमन्डले क्वालिफायरमा स्थान बनाएको हो। यसअघि डायमन्डले जित्ने समूहबाट तेस्रो स्थानमा र पुलिस हार्ने समूहबाट शीर्ष स्थानमा रहँदै एलिमिनेटरमा प्रवेश गरेका थिए।
महिलातर्फको एलिमिनेटर खेलमा डायमन्डले पुलिसलाई ३–० को सोझो सेटमा पराजित गरेको थियो। खेलको पहिलो सेट २५–२२, दोस्रो सेट २५–१४ र तेस्रो सेट २५–२१ ले पुलिस पराजित भएको थियो । डायमन्डले अब फाइनल प्रवेशका लागि सशस्त्र प्रहरी बलको नेपाल एपिएफ क्लब र आयोजक टाइगर ग्रुपबिच शुक्रबार हुने खेलमा पराजित हुने टोलीसँग प्रतिस्पर्धा गर्नेछ।
प्रतियोगिताअन्तर्गत बिहीबार सम्पन्न पुरुषतर्फ लिग चरणको खेलमा आर्मीले पाहुना टोली भारतको सुनील भलिबल क्लबलाई ३–२ को सेटमा पराजित गर्दै क्वालिफायरमा स्थान सुरक्षित गरेको थियो। क्वालिफायरमा आर्मीले पुलिससँग भिड्नेछ। आर्मीले जित्ने समूहबाट शीर्ष स्थानमा र पुलिस दोस्रो स्थानमा रहँदै क्वालिफायरमा प्रवेश गरेका हुन्। भारतको सुनील क्लबले एलिमिनेटरमा स्थान बनाएको छ।
आर्मी र भारतको टोलीबिच भएको खेलको पहिलो सेट २०–२५ ले पछि परेको अवस्थालाई उल्टाउँदै दोस्रो सेट २५–१८ र तेस्रो सेट २५–२३ ले आर्मीले आफ्नो पक्षमा पारेको थियो। चौथो सेटमा २३–२५ ले आर्मी पछि परेपछि खेलको निर्णायक अर्थात् पाँचौँ सेटमा १५–१२ ले आर्मीले जित हात पारेको थियो।
पुरुषतर्फ लिग चरणको अन्तिम खेलमा जित हात पार्दै घरेलु टोली गण्डकी प्रदेशले एलिमिनेटरमा स्थान सुरक्षित गरेको छ। लिगको अन्तिम खेलमा गण्डकीले हेल्प नेपाल स्पाेर्टस् क्लबलाई ३–१ सेटले पाखा लगाएको थियो। खेलमा पहिलो सेट २५–२१ ले आफ्नो पक्षमा पारेको हेल्प नेपाल त्यसपछिको दोस्रो सेट २१–२५, तेस्रो सेट २२–२५ र चौथो सेट २४–२६ ले पराजित हुन पुगेको थियो।
जितसँगै गण्डकीले हार्ने समूहबाट ६ अंकसहित शीर्ष स्थानमा रहँदै एलिमिनेटरमा स्थान बनाएको हो। अब गण्डकीले जित्ने समूहमा तेस्रो स्थान बनाएको भारतको सुनील क्लबसँग एलिमिनेटरमा प्रतिस्पर्धा गर्नेछ।
हारसँगै यसअघिको चौथो संस्करणको विजेता हेल्प नेपाल प्रतियोगिताबाट बाहिरिएको छ । यसअघि सशस्त्र प्रहरीको नेपाल एपिएफ क्लब प्रतियोगिताबाट बाहिरिइसकेको थियो।
शुक्रबारको खेल
प्रतियोगिताअन्तर्गत शुक्रबार महिलातर्फ क्वालिफायरमा एपिएफ र आयोजक भिड्ने भएका छन्। यसैगरी पुरुषतर्फको क्वालिफायरमा आर्मी र पुलिस भिड्दा एलिमिनेटरमा गण्डकी र भारतको टोली भिड्ने भएका छन्।
