आहा ! रारा पोखरा गोल्ड कपको खेल तालिका सार्वजनिक 

मोफसलको बहुप्रतिष्ठित राष्ट्रिय तथा अन्तर्राष्ट्रिय अन्तर क्लब आमन्त्रित आहा ! रारा पोखरा गोल्ड कप फुटबल प्रतियोगिताको २४औँ संस्करणमा सहभागी हुने टोलीसँगै खेलतालिका सार्वजनिक भएको छ। प्रतियोगिता २२ माघदेखि ३ फागुनसम्म चल्नेछ।

प्रतियोगितामा ए डिभिजन, विभागीय, मोफसल, आयोजकसँगै नौ स्वदेशी र तीन विदेशी गरी १२ टोलीले प्रतिस्पर्धा गर्ने आयोजक क्लबका अध्यक्ष केशवराज बरालले जानकारी दिए। बरालका अनुसार प्रतियोगितामा थ्री स्टार क्लब, मच्छिन्द्र फुटबल क्लब, संकटा क्लब, ब्रिगेड ब्वाइज क्लब, एन आरटी फुटबल क्लब, अपी पावर चर्च ब्वाइज युनाइटेड फुटबल क्लबसँगै विभागीय टोलीहरू नेपाल प्रहरीको नेपाल पुलिस क्लब, नेपाली सेनाको त्रिभुवन आर्मी क्लब, सशस्त्र प्रहरी बलको नेपाल एपिएफ क्लब र आयोजक सहारा क्लब गरी स्वदेशका नौ टोलीले प्रतिस्पर्धा गर्नेछन्। यसैगरी, पाहुना टोली युकेको बिग्रेड ब्वाइज फुटबल क्लब, भारतको थन्डरबोल्ट नर्थ युनाइटेड र उज्वेकिस्तानको ब्ल्याक बुल्स फुटबल क्लबले प्रतियोगितामा सहभागी हुने भएका छन्।

आयोजकले बिहीबार सहभागी १२ टोलीको नामसँगै खेल तालिका सार्वजनिक गरेको हो। सहभागी १२ टोलीलाई दुई समूहमा विभाजन गरिएको छ। समूह ‘ए’ मा ब्रिगेड ब्वाइज, आयोजक, पुलिस, एनआरटी, चर्च ब्वाइज र आर्मी रहेका छन् भने समूह ‘बी’ थ्री स्टार, एपिएफ, मच्छिन्द्र, भारतको थन्डरबोल्ट, संकटा, र उजेकिस्तानको टोली रहेका छन्।
सार्वजनिक खेल तालिकाअनुसार उद्घाटन खेलमा आयोजक र पुलिस भिड्ने भएका छन्। सहभागीमध्ये दुई विदेशी टोली ब्रिगेड ब्वाइज र उज्वेकिस्तानको टोलीसँगै थ्री स्टार र आर्मीले वाई पाएर सीधैँ क्वार्टरफाइनल खेल्नेछन्।

दोस्रो खेलमा एपिएफ र मच्छिन्द्र, तेस्रो खेलमा एनआरटी र चर्च ब्वाइज, चौथो खेलमा संकटा र भारतको टोली प्रिक्वार्टर फाइनलको खेलमा भिड्नेछन्। क्वार्टरफाइनलअन्तर्गत पहिलो खेलमा युकेको टोलीले सहारा र पुलिसबिचको खेलको विजेतासँग २६ माघ, एपिएफ र मच्छिन्द्र बिचको खेलको विजेतासँग थ्री स्टारले २७ माघ, एनआरटी र चर्च ब्वाइजबिचको विजेतासँग आर्मीले २८ माघ, संकटा र भारतको टोलीबिचको विजेतासँग उज्वेकिस्तानको टोलीले चौथो तथा अन्तिम क्वार्टरफाइनल खेलमा २९ माघमा भिड्नेछन्।

क्लबका पूर्वअध्यक्ष वीरभद्र आचार्यका अनुसार प्रतियोगिताको विजेताले १२ लाख र उपविजेताले ६ लाखसहित सिल्ड, मेडल र प्रमाणपत्र पुरस्कार पाउनेछन्। यसैगरी, सर्वोकृष्ट खेलाडीले स्कुटर पुरस्कार पाउँदा विधागत रूपमा सर्वाधिक गोलकर्ता, उत्कृष्ट डिफेन्डर, गोलरक्षक, मिडफिल्डर, स्टाइगर र प्रशिक्षकले २५ हजार नगद सगै टफ्री पुरस्कार पाउँदा फेएर प्लेको रूपमा एक टोलीलाई पुरस्कृत गरिनेछ। 

सहारा क्लब पोखराको आयोजना तथा हिमश्री फुड्स प्रालिको उत्पादन आहा तथा रारा तयारी चाउचाउको मुख्य प्रायोजन हुने प्रतियोगिताको संरक्षकमा पोखरा महानगरपालिका रहेको छ । जयश्री फुड्स प्रालिको उत्पादन भान्छाघर लंग्रेन प्रिमियम बासमती राइसले प्रतियोगिता सहप्रायोजन गरेको छ।