मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १५ बिहीबार
  • Thursday, 28 March, 2024
२०७९ कार्तिक २४ बिहीबार १५:४३:००
Read Time : < 1 मिनेट
समाचार डिजिटल संस्करण

म हिँडेका धुलाम्मे सडक मेरै कार्यकालमा कालोपत्रे गर्छु : प्रचण्ड

Read Time : < 1 मिनेट
२०७९ कार्तिक २४ बिहीबार १५:४३:००

पूर्वप्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल प्रचण्डले राजनीतिक अवस्था परिवर्तन भए पनि जनताको अवस्था परिवर्तन नभएकाले आर्थिक क्रान्ति सम्पन्न गर्न गोरखा आएको बताएका छन्।
  
बिहीबार जिल्लाको अजिरकोट गाउँपालिका– १ स्थित याच्चोकमा आयोजित चुनावी कार्यक्रमलाई सम्बोधन गर्दै उनले यस्ताे बताएका हुन्। 

प्रचण्डले भने, ‘राजनीतिक परिवर्तनको तयारी गोरखाको यही भूगोलबाट गरेको हुँ, राजनीतिक परिवर्तन भयो, तर जनताको अवस्था परिवर्तन भएन, जनतालाई समृद्ध बनाउन र देशमा आर्थिक क्रान्ति गर्न गोरखा निर्वाचन क्षेत्र नम्बर २ मा आएको हुँ।’

उनले निर्वाचनबाट चुनिएर समग्र गोरखाको विकास निर्माणलाई पूर्णता दिने प्रतिबद्धता व्यक्त गरे। ‘मैले यसअघि जितेको चितवनमा ६११ किलाेमिटर बाटो कालोपत्रे भएको छ। म हिँडेका धुलाम्मे बाटाहरू मेरै कार्यकालमा कालोपत्रे गर्ने प्रतिबद्धता व्यक्त गर्दछु,’ उनले भने। 

विद्युतको राष्ट्रिय प्रसारण लाइन ल्याउन आफूले पहल गर्ने, शिक्षा, स्वास्थ्य र रोजगारी वृद्धि गर्ने, गाउँमा जडीबुटी उद्योग स्थापना गर्ने, हिमाली पर्वतीय पर्यटकीय क्षेत्रको विकास गर्ने र समृद्धिको सन्देश गोरखाबाट देश र विश्वभरि दिने उनले बताए। 

प्रचण्डले राजनीतिक क्रान्तिका लागि गोरखा जसरी उर्वर भूमि बन्यो त्यसरी नै समृद्धिको नयाँ क्रान्तिका लागि गोरखा उपयुक्त रहेको बताए।
 
चुनावी कार्यक्रमका लागि आज गोरखा आइपुगेका प्रचण्ड मुच्चोक, जौबारी, ताकुलगायतका कार्यक्रममा सहभागी हुने कार्यक्रम छ।