सुदूरपश्चिम प्रदेश सरकारले हालैको बाढीपहिरोमा आफन्त गुमाएका र घरमा क्षति भएका परिवारलाई राहतस्वरूप दिने भएको छ । मृतकका परिवारलाई राहतस्वरूप एक लाख रुपैयाँ र किरिया खर्चबापत थप २० हजार रुपैयाँ दिने निर्णय भएको सरकारका प्रवक्ता एवं आन्तरिक मामिला तथा कानुनमन्त्री रणबहादुर रावलले जानकारी दिए । घर क्षति भएकालाई प्रतिपरिवार ५० हजार रुपैयाँ दिने निर्णय सरकारले गरेको छ ।
पीडितलाई तत्काल खाद्यान्न, त्रिपाललगायत राहत सामग्री वितरणका लागि सम्बन्धित स्थानीय तहहरूलाई प्रदेश सरकारले नगद रकम निकासा दिने मन्त्री रावलले बताए । गत शुक्रबार र शनिबारको बाढीपहिरो र डुबानले सुदूरपश्चिममा धनजनको ठूलो क्षति भएको छ ।
अविरल वर्षापछि सुदूरपश्चिमका विभिन्न जिल्लामा गत शुक्रबार आएको बाढीपहिरोमा परेर २६ जनाले ज्यान गुमाएका छन् । अछाममा २३ र कैलालीमा तीनजनाको मृत्यु भएको आन्तरिक मामिला तथा कानुन मन्त्रालयले जनाएको छ । कैलाली र कञ्चनपुरमा दर्जनौँ घर डुबानमा परेका छन् । डुबान र कटानले कतिपय घर बगेका छन् ।
घरभित्र रहेको अन्न र लुगाफाटो बगेपछि पीडित परिवारको बिचल्ली भएको छ । विस्थापित भएका परिवार घर फर्केका छन्, तर घरभित्र बाढी नसुक्दा र अन्नपात भिजेकाले उनीहरूलाई समस्या भएको छ ।