काठमाडौं जिल्ला अदालतका न्यायाधीश राजकुमार कोइरालामाथिको जाँचबुझ सकाएर न्यायपरिषद्ले प्रतिवेदन तयार पारेको छ । तर, प्रतिवेदन परिषद् अध्यक्ष तथा प्रधानन्यायाधीश दीपककुमार कार्कीलाई बुझाउन बाँकी छ । कायममुकायम प्रधानन्यायाधीश बिरामी परेपछि परिषद् बैठक बस्न सकेको छैन । १८ साउनयता प्रधानन्यायाधीश इजलासमा उपस्थित भएका छैनन् । यसअघि भने परिषद्सदस्य कानुनमन्त्री गोविन्द बन्दी अस्वस्थ भएपछि बैठक प्रभावित भएको थियो । 

पछिल्लोपटक १० साउनमा परिषद् बैठक बसेको थियो । त्यसयता अध्यक्ष तथा सदस्य बिरामी भएपछि प्रभावित बनेको हो । ‘प्रतिवेदन तयार भएको झन्डै दुई साता भइसक्यो । बैठक बस्न नसक्दा प्रतिवेदन बुझाउन सकिएको छैन,’ स्रोतले भन्यो । समिति संयोजक परिषद् सदस्य रामबहादुर श्रेष्ठ र उच्च अदालत पाटनका कायममुकायम मुख्य न्यायाधीश महेशप्रसाद पुडासैनी तथा पाटनकै अर्का न्यायाधीश महेश शर्मा पौडेल सदस्य छन् ।

अधिवक्ता रुद्र पोखरेल र न्यायाधीश कोइरालाबीचको टेलिफोन संवाद १० असारमा बाहिरिएपछि जाँचबुझका लागि तीन सदस्यीय जाँचबुझ समिति गठन गरिएको थियो । ठगी तथा संगठित अपराधका आरोपित इच्छाराज तामाङलाई धरौटीमा रिहा गर्ने विषयमा कुराकानी भएको अडियो बाहिरिएपछि जाँचबुझ समिति गठन गरिएको हो ।

समितिले तोकिएको समयभित्र जाँचबुझ गरी परिषद्लाई प्रतिवेदन बुझाउनुपर्ने व्यवस्था छ । समितिले आरोपित न्यायाधीश र अधिवक्तालाई समेत सूचना दिने, म्याद तामेल गराउने, बयान गराउने, साक्षी–प्रमाण बुझ्नेजस्ता कार्य गराउँछ । यसरी प्राप्त प्रतिवेदनमाथि थप कारबाही परिषद्ले गर्छ । दोषी देखिए परिषद्लाई सम्बन्धित न्यायाधीशलाई पदमुक्तदेखि भ्रष्टाचार मुद्दा दायर गर्नसम्मको अधिकार छ ।