केही दिनदेखि लगातार रूपमा परेको अविरल वर्षाका कारण घरमाथिबाट पहिरो झर्दा मन्थली नगरपालिका– १२ गेलु रजाई टोलका १५ घर पहिरोको उच्च जोखिममा रहेका छन् ।  ६ घरपरिवार विस्थापित भएका छन् । 

गेलु रजाई टोलमा रहेको अग्लेश्वर मन्दिरको पश्चिमतर्फको डिलमा ठूलाठूला धाँजा फाट्दै चर्किएर पहिरो झरेपछि पहिरोमुनि रहेका १५ घरपरिवार उच्च जोखिममा परेका हुन् । पहिरोबाट विस्थापित हुनेहरूमा योगेन्द्र अधिकारी, भोजबहादुर अधिकारी, मोहनबहादुर अधिकारी, केशव अधिकारी, तोरणबहादुर अधिकारी र कृष्णमाया अधिकारी गरी ६ घरपरिवार विस्थापित भएका छन् । 

पहिरोबाट विस्थापित परिवारबाहेकका अन्य ११ घर पनि उच्च जोखिममा रहेका छन् । पहिरोमुनि घर भएका नागरिक अहिले कतिखेर घरमाथिबाट पहिरो झर्छ भन्ने त्रासमा दिनरात कटाउन बाध्य छन् । गेलुमा यसअघि पनि वर्षातको समयमा पटक–पटक पहिरो जाने समस्याले नागरिकलाई सताउँदै आएको थियो ।

पहिरोबाट विस्थापित परिवार अहिले छिमेकी र आफन्तको शरण लिएर बसेका छन् भने केही विस्थापित बारीको पाटोमा त्रिपाल हालेर बस्न बाध्य भएको जिल्ला प्रहरी कार्यालय रामेछापका प्रवक्ता राजुप्रसाद ढकालले जानकारी दिए ।