जिल्लामा बाढीपहिरोबाट ५० हजार पाँच सय घरपरिवार जोखिममा रहेका छन् । जिल्ला विपत् व्यवस्थापन समितिको बैठकले उक्त तथ्यांक सार्वजनिक गरेको हो ।
जिल्ला विपत् पूर्वतयारी तथा प्रतिकार्य योजना परामर्शदाता बलराम लुइँटेलका अनुसार जिल्लाका सात पालिकाका दुई लाखभन्दा बढी नागरिक वर्षाका कारण प्रभावित बन्नेछन् । बाढीबाट भरतपुर महानगरपालिका बढी प्रभावित हुने देखिएको छ । भरतपुर महानगरपालिकामा ३० हजार परिवार प्रभावित बन्ने अवस्था रहेको जानकारी दिए ।
यस्तै, माडी नगरपालिकाका चार हजार पाँच सय परिवार, रत्ननगरका पाँच हजार, कालिका नगरपालिकाका एक हजार ५०, खैरहनी नगरपालिकाका तीन सय २० र राप्ती नगरपालिकाका ११ परिवार प्रभावित हुने अवस्था छ ।
यसैगरी, पहिरोका कारण भरतपुर महानगरपालिकाका तीन सय, कालिकाका एक सय, राप्तीका दुई सय तथा इच्छाकामना गाउँपालिकाका एक सय २५ परिवार प्रभावित बन्ने अवस्था रहेको जिल्ला विपत् व्यवस्थापन समितिले जनाएको छ ।
बाढी र पहिराको खतरा बढेकाले सतर्कता अपनाउन प्रमुख जिल्ला अधिकारी आसमान तामाङले आग्रह गरे । उनले भने, ‘नारायणी र राप्ती नदीका कारण जोखिम बढेको छ । जोखिम न्यूनीकरणको तयारीमा जुटेका छौँ ।’
उद्धारका लागि सुरक्षा निकायलाई सतर्क अवस्थामा रहन निर्देशन दिइएको उनले बताए ।