जिप र मोटरसाइकल ठोक्किँदा पृथ्वीराजमार्गअन्तर्गत व्यास नगरपालिका– १२ देउरालीमा दुईजनाको मृत्यु भएको छ । मृत्यु हुनेमा हेटौँडा उपमहानगरपालिका– १३ बस्ने २६ वर्षीय जयराम मोक्तान र भीमफेदी गाउँपालिका– १ बस्ने २३ वर्षीय दीपेश गोले रहेका छन् ।
डुम्रेबाट दमौलीतर्फ आउँदै गरेको बा.४३प ३०२० नम्बरको मोटरसाइकल र विपरीत दिशाबाट आउँदै गरेको ग.३च ४१८२ नम्बरको बोलेरो जिप एक–आपसमा ठोक्किँदा मोटरसाइकलमा सवार दुईजनाको ज्यान गएको जिल्ला प्रहरी कार्यालय तनहुँका प्रहरी नायव उपरीक्षक युवराज खड्काले जानकारी दिए ।
‘दुर्घटनामा गम्भीर घाइते भएका दुवैको उपचारको क्रममा अस्पतालमा मृत्यु भएको हो । शवलाई पोस्टमार्टमका लागि दमौली अस्पतालमा राखिएको छ,’ उनले भने । बोलेरो जिप र चालकलाई भने प्रहरीले नियन्त्रणमा लिएर अनुसन्धान गरिरहेको छ ।