- वि.सं २०८१ बैशाख ७ शुक्रबार
सिरिए लिगमा पोर्चुगिज स्टार क्रिस्टियानो रोनाल्डो कति चर्चित छन् भन्ने उनका समर्थकको प्रतिक्रियाले स्पष्ट हुन्छ । सिरिए लिगअन्तर्गत शनिबार युभेन्टसले गिएनोविरुद्धको खेलमा रोनाल्डोलाई रेस्टमा राखेको छ । गिएनोको घरेलु मैदानमा हुने प्रतिस्पर्धामा युभेन्टसका समर्थकले स्टाडियो लुइगी फरानिस रंगशालासम्म टिकट काटिसकेका थिए । युभेन्टसका फ्यानले विशेषतः रोनाल्डोको खेल हेर्नकै लागि लामो दूरीको टिकट काटेका हुन् ।
जब युभेन्टसका प्रशिक्षक मासिमिलानो अल्गेरीले गिएनोविरुद्धको प्रतिस्पर्धामा स्टार स्ट्राइकर रोनाल्डोलाई आराममा राखेको विज्ञप्ति जारी गरे, त्यसपछि समर्थक खुवै रिसाए । तत्कालै उनीहरूले सामाजिक सञ्जालबाटै यभुेन्टसका व्यवस्थापकसँग टिकटको पैसा माग गरेका छन् । ‘हामीले रोनाल्डोको खेल हेर्नकै लागि टिकट किनेका हौँ, युभेन्टसको खेल हेर्नका लागि होइन,’ रोनाल्डोका एक समर्थकले भने, ‘रोनाल्डोले नै प्रतिस्पर्धा गर्दैनन् भने हामी त्यहाँ किन जाने ? टिकटको पैसा हामीलाई उपलब्ध गराउनुपर्छ ।’ यता प्रशिक्षक अल्गेरीले भने आसन्न च्याम्पियन्स लिगको क्वार्टरफाइनल खेललाई मध्यनजर गरेर नै रोनाल्डोलाई रेस्टमा राखेको जनाएका छन् ।
‘हामीले केही दिनपछि नै च्याम्पियन्स लिगमा प्रतिस्पर्धा गर्नुपर्छ, मुख्य खेलाडी फिट हुनु पनि जरुरी छ,’ उनले भने, ‘रोनाल्डोलाई आराममा राख्दा त्यसको फाइदा क्लबलाई पुग्नेछ र समर्थकले पनि भविष्यमा राम्रै नतिजा पाउनेछन् ।’ सिरिए लिगमा युभेन्टसले शीर्ष स्थानमा १८ अंकको अग्रता बनाएको छ ।
