कार्यकर्तालाई ११ बुँदे सम्झाउँदै सिके राउत
सरकारसँगको सहमतिका पक्षमा छलफल गर्न स्वतन्त्र मधेस गठबन्धनको राष्ट्रिय परिषद् बैठक आइतबारदेखि सिरहाको लहानमा सुुरु
सरकारसँग २४ फागुनमा भएको ११बुँदे सहमतिपछि सिके राउतले पहिलोपटक कार्यकर्ता भेला गरेका छन् । सहमतिबारे अगुवा कार्यकर्तालाई सम्झाउन स्वतन्त्र मधेस गठबन्धनको राष्ट्रिय परिषद् बैठक आइतबार दिउँसोदेखि सिरहाको लहानमा सुुरु भएको हो ।
गठबन्धनका संयोजक राउतले ११बुँदे सहमतिपछि आगामी रणनीतिबारे छलफल गर्न परिषद् बैठक भइरहेको राष्ट्रिय परिषद् सदस्य सुदीपराज कुशवाहाले जानकारी दिए । कुशवाहाका अनुसार बैठकमा तराई–मधेसअन्तर्गत २२ जिल्लाबाट परिषद्मा प्रतिनिधित्व गर्ने करिब दुई सयजनाको सहभागिता छ ।
‘सहमतिप्रति खुसियाली’
कुशवाहाका अनुसार परिषद् बैठक राउतले पानसमा बत्ती बालेर उद्घाटन गरेका थिए । उद्घाटन मन्तव्यमा राउतले ११बुँदे सहमतिकै सेरोफेरोमा बोलेको बताइएको छ । उद्घाटनपछि हरेक जिल्लाबाट सहभागीले सहमतिबारे आ–आफ्ना धारणा राखिरहेको उनले जानकारी दिए । ‘सहभागीहरू सबैले सहमतिको स्वागत गर्दै खुसी व्यक्त गरेका छन्,’ उनले भने, ‘सहमतिबारे सहभागीहरूको धारणा व्यक्तपछि आगामी रणनीति तय गरी सम्भवतः सोमबार रातिसम्म बैठक समापन गरिनेछ ।’
देखिएन गठबन्धनको झन्डा र ब्यानर
लहान नगरपालिका–७ स्थित मारवाडीसेवा सदनको सभाकक्षमा जारी बैठकमा सहभागी हुन राउत आइतबार बिहान करिब १० बजेतिर पिएसओ र सीमित कार्यकर्तासहित लहान आइपुगेका थिए । सरकारसँगको ११बुँदे सहमतिपछि पहिलोपटक २८ फागुनमा जनकपुर आएका उनलाई गठबन्धनसम्बद्ध कार्यकर्ताले स्वागत गरेका थिए । त्यहाँजस्तो गठबन्धनका पक्षमा प्रदर्शन र झन्डा र ब्यानर लहानमा भने देखिएन ।
बैठकमा सहभागी नेता कार्यकर्ताहरूलाई बस्नेखाने सुविधा सदनभित्रै व्यवस्था गरिएको कुशवाहाले बताए । परिषद् बैठकमा सहभागी हुन विभिन्न जिल्लाबाट आएका सहभागीहरूलाई पनि आइतबार बिहान प्रवेश गर्नुअघि सदनको मूल गेटमा नेपाली नागरिकता अनिवार्य गरिएको थियो ।
सञ्चारकर्मीलाई निषेध
परिषद्को उद्घाटन राष्ट्रगानबाट गरिएको भन्नेबारे चर्चा थियो । कुशवाहाले भने लहान क्षेत्रका स्कुले विद्यार्थीहरू आफैँले रचना गरेको स्वागत गीत मात्र प्रस्तुत गरेको बताए । बैठकको विषयमा रिपोर्टिङका लागि भित्र जान चाहने पत्रकारलाई सदनको मूल गेटबाटै फर्काइएको थियो । नेपाल प्रहरी र सशस्त्र प्रहरी बलका आधाआधा गरी करिब एक दर्जन प्रहरी सदनको बाहिर सुरक्षामा खटिएका छन् ।
- २२ जिल्लाबाट २०० नेता–कार्यकर्ता सहभागी
- बैठकमा सहभागी हुन नेपाली नागरिकता अनिवार्य
- बन्दसत्रमा ११ बुँदे बारे छलफल
- सहभागीहरुलाई बस्ने–खाने व्यवस्था बैठक स्थलमै