पोखराबाट जोमसोमका लागि उड्ने क्रममा बेपत्ता भएको तारा एयरको विमानको अवस्थाबारे अझै पत्ता लागेको छैन। मुस्ताङको लेतेमा दुर्घटनाको आशंका गरिए पनि दुर्घटनाको कुनै संकेत फेला परेको छैन।

थासाङ गाउँपालिका– ३ मा पर्ने लेतेमा कुनै दुर्घटना भएको जानकारी प्राप्त नभएको गाउँपालिका अध्यक्ष प्रदीप गौचनले बताए। नयाँ पत्रिकासँग कुरा गर्दै उनले लेतेमा दुर्घटना भएको भन्दै आएको समाचारमा कुनै सत्यता नरहेको बताए।

‘पानी परिरहेको छ। बादल लागेको छ, डाँडाकाँडा देखिने स्थिति छैन,’ उनले भने, ‘लेते र आसपासका क्षेत्रमा दुर्घटनाको कुनै जानकारी र संकेत फेला परेको छैन। स्थानीयबाट पनि यसबारे केही जानकारी छैन।’

उनले आफूहरू प्रहरीसमेतको सहयोगमा खोजीमा लागिरहेको बताए। उनले भने,  ‘टेलिफोन सम्पर्क सबैतिर भइरहेको छ, तैपनि कुनै जानकारी आएको छैन। मानव बस्ती आसपास त्यस्तो केही देखिएन, मानबस्तीबाहिरको अवस्थामबारे जानकारी लिइरहेका छौँ।’