वैशाख ३० गते हुने स्थानीय तहको निर्वाचनका लागि मनाङका मतदान केन्द्रहरूमा निर्वाचन सामग्रीसहित कर्मचारी पुगेका छन् । मतदान गर्ने समय नजिकिएसँगै हिमाली जिल्ला मनाङको दुर्गममा रहेको नार्पाभूमि गाउँपालिकामा दुई दिनको पैदल यात्रापछि कर्मचारी र सुरक्षाकर्मी मतदान केन्द्रमा पुगेका हुन् ।
मनाङका प्रमुख जिल्ला अधिकारी रवीन्द्र आचार्यका अनुसार कर्मचारी र सुरक्षाकर्मीको टोली सोमबार बिहान ५ बजे सदरमुकाम चामेबाट हिँडेर मंगलबार दिउँसो नार्पाभूमिको मतदान केन्द्रमा पुगेका हुन् । मनाङको नार्पाभूमि गाउँपालिकाको पाँचवटा मतदान केन्द्रमा निर्वाचन सामग्रीसहित कर्मचारी पुगेको उनले बताए ।
उनीहरूले मतदान केन्द्रहरूमा सूचना टाँस गर्ने, चारकिल्ला तोक्नेलगायतका गतिविधिहरू गर्नेछन् । मनाङका चारवटै स्थानीय तहका मतदान केन्द्रमा निर्वाचन सामग्रीसहित कर्मचारी पुगेको जिल्ला निर्वाचन कार्यालय मनाङका निर्वाचन अधिकारी पुष्पराज शर्माले बताए । स्थानीय तहको निर्वाचनका लागि मनाङमा दुई सयभन्दा बढी कर्मचारी र सात सय बढी सुरक्षाकर्मी खटिएका छन् ।
निर्वाचनका लागि मनाङमा २८ वटा मतदान केन्द्र कायम भएको छ । २८ वडा रहेको मनाङमा प्रत्येक वडामा मतदान केन्द्र छ । मनाङमा नासों गाउँपालिका र मनाङ ङिस्याङ गाउँपालिकामा नौ–नौ मतदान केन्द्र, चामे गाउँपालिका र नार्पाभूमि गाउँपालिकामा पाँचवटा मतदान केन्द्र कायम भएको छ ।
मनाङमा नौ हजार मतपत्रलगायत निर्वाचन सामग्री नेपाली सेनाको हेलिकोप्टरबाट ढुवानी गरिएको थियो । मतपत्रलाई सुरक्षितसाथ जिल्लाको २८ वटै मतदानस्थलमा पुर्याइएको मुख्य निर्वाचन अधिकृत पुनाराम खनालले बताए । मनाङमा ६ हजार चार सय ९६ मतदाता छन् । जसमा महिला तीन हजार तीन सय ४८ र पुरुष तीन हजार एक सय ४८ छन् ।